Сүлүүдэ хостоммот буолан...

Аҕа дойду Улуу сэриитин сылларыгар үлэлэрин саҕалаабыт Эмэлдьээк, Хаталаак бириискэлэр эстэннэр, ол бөһүөлэктэр олохтоохторо 90-с сылларга Ыыллымахха көһөн кэлбиттэрэ. Ыыллымах да бириискэтэ уһаабатаҕа, сабыллыбыта. Билигин уруккута 600-тэн тахса нэһилиэнньэлээх бөһүөлэккэ барыта 469 киһи, ол иһигэр хаайыыттан босхолонон баран ханна да барар сирэ суох 105 киһи олорор. 34 үөрэнээччилээх орто оскуола, бэкээринэ, оҕо саада, 4 чааһынай маҕаһыын бааллар.

70-с сылларга сүлүүдэ хостооһунугар үлэтин саҕалаабыт Григорий Колонтай ыһыллыы-тоҕуллуу саҕана бастаан поссовет бэрэссэдээтэлинэн, кэннэки сылларга ол дуоһунаһы суох оҥороннор, Томмот куоратын дьаһалтатыгар биэрэннэр кылаабынай специалист быһыытынан Ыыллымах бөһүөлэгин дьаһайар эбит.

Олохтоохтор дьиэлэрэ эргэрбитин эттилэр, сорохтор дьиэлэрин бас билиигэ оҥотторон баран, атын сиргэ баран олороллорун, ону хаарбах дьиэлэр программаларыгар кыайан киирбэккэ хаалбыт дьоннорго ылан биэрэллэригэр көрдөстүлэр. Ону Ил Түмэн депутата О.В. Балабкина чааһынай бас билиигэ баар кыбартыыра атын хаһаайыҥҥа кыайан бэриллибэтин быһаарда. Үлэ миэстэтэ суох буолан ыччаттар аҕыйахтар, кырдьаҕастар дьиэлэрэ эргэрэн, кырыыһалара тэстэр буолбут, “халлааны көрө сытабыт” диир эмээхситтэр бааллар. Онуоха Томмот куоратын баһылыга А.В. Заверюха “Жилсервис”( салайааччы Тимофеев В.А.) бэриллибит сайаапканан сыл аайы былаан быһыытынан өрөмүөн үлэтин ыытабыт диэн эппиэттээтэ. АлександрЮрьевич Интернет, суотабай сибээс, суол туһунан быһаарыыны эрэйэр боппуруостары боротокуолга киллэрэн, көмөлөһө сатыахпыт диэн эрэннэрдэ.

Барыта биирдэ кыайан быһаарыллыбат

Ыыллымах кэнниттэн Томмот куоратыгар көрсүһүү буолла. Син сөбүгэр нэһилиэньэлээх куоракка мунньахха 61 эрэ киһи кэлбитин көрөн отчуот оҥорооччулар астымматылар.

Ааспыт сылга Томмокко саҥа поликлиника, быйыл Исскуство дьиэтэ үлэҕэ киирдилэр, хаарбах дьиэлэргэ олорор дьону көһөрүүгэ быйылгыттан саҕалаан 3-түү этээстээх 24 квартиралаах икки дьиэ тутуутун АК ”ЖДЯ” ААУо бэдэрээтинэй тэрилтэтэ саҕалаата. Бу дьиэлэр 2015 сыл ахсынньытыгар үлэҕэ киириэхтээхтэр. Алексеевскайга модульнай хочуолунай үлэлии турар. Онон нэһилиэнньэ кыһалҕата былааннаахтык быһаарыллан иһэрин олохтоохтор эттилэр. Ол гынан баран саҥа поликлиника көдьүүһэ тоҕо кыратын ыйыттылар, саҥа инвест-бырайыактар саҕаланыахтаахтарынан, Томмокко рабочай идэлэргэ үөрэтэр орто үөрэх кыһатын аһары туруорустулар. СӨ доруобуйа харыстабылыгар миниистирэ Л.И. Вербицкая поликлиника үлэтин хайысхатын уларыттахпытына көдьүүһэ үрдүөҕэ диэн эппиэттээтэ.

“Якокит үүтүн” иһиэхпит

Сарсыныгар Якокит оскуолатын кыра саалатыгар отчуоту истии буолла. Тимир суоллар ылсаннар модульнай хочуолунай туруоруллан, бөһүөлэк 90%-на итиинэн хааччыллыбыт. Уруккута үүт табаарынай фермата ыһыллан эрэрин Украина Донбаһын ыччаттара кэлэннэр хаттаан сөргүтэн эрэллэр. Олохтоохтор Л.И. Вербицкаяҕа туһаайан Аллараа Кураанахха поликлиникаҕа көрдөрүү, күнүскү стационарга тиксии ыарахаттардааҕын эттилэр, сири ылыы боппуруостарын көтөхтүлэр.

Армян киһитэ кыыһырар

Аллараа Кураанахха отчуот истиитэ 11 чаастан саҕаланна. Урукку сыллардааҕар аҕыйах киһи сырытта.

Биир армян киһитэ улаханнык кыыһырбытын биллэрдэ, маннааҕы салалтаҕа дьиэбин баран хайдах олорорбун көрүн диирбин истибэттэр, онон эһиги баран билсиҥ, пааспар биэрбэттэр, оттор маһым суох, дьиэм тоҥ хаһаа диэн эттэ. Александр Юрьевич мунньах кэнниттэн кэпсэтиэхпит диэн уоскутта. Аллараа Кураанахтан барарбытыгар А.Ю.Соловьев, О.В.Балабкина, С.Н.Поздняков “Кыайыы аллеятыгар” тыынаах сибэкки дьөрбөтүн уурдулар.

Эмп үлэһиттэрэ тиийбэттэр

Күн иккис аҥарыгар Александр Юрьевич оройуоннааҕы дьаһалта дьиэтигэр нэһилиэнньэни приемнаата. Баҕалаах элбэх буолан, 5 чаастан буолуохтаах отчуот хойутаан саҕаланна. Куруутун да буоларын курдук киһи элбэх. Урукку сылларга тымныы дьиэлэр, тэстэр турбалар, хаарбах дьиэлэр өрөмүөннэрин тустарынан кэпсэтии барар эбит буоллаҕына, билигин дьон-сэргэ ыйытар, туруорсар боппуруоһа атын. Ордук элбэх боппуруоска Л.И.Вербицкая хоруйдаата. Дьиэ-уот тиийбэтин, ол иһин быраастар кэлбэттэрин, диагноһы сыыһа туруордахха туох эппиэтинэс баарын, атын сиргэ баран көрдөрүөхтэрин баҕардахтарына направление хантан ылыахха сөбүн,барокамера, алын сүһүөх эмп үлэһиттэригэр хамнастара кыратын о.д.а. эттилэр, ыйыттылар. Олох дьаһах, коммунуальнай хаһаайыстыба өҥөнү оҥорор тарыыптарыгар кэккэ ыйытыылар киирдилэр, уруккуттан туруорсар бассейнара хаһан үлэҕэ киириэҕин, хоккей площадкатын, ракета түһэр тобохторун туһунан токоолостулар.