Былырыын Томпоҕо Доруобуйа харыстабылын министиэристибэтэ кэлэ сырыттаҕына олохтоохтор Кириэс Халдьаайыга участактааҕы балыыһа, Арыы Толооҥҥо фелдьшерскэй-акушерскай пуун тутуутун туруорсубуттар. Ол эрээри быйылгы өрөспүүбүлүкэ инвестиционнай бырайыагар бу тутуулар суохтар. Арай государство уонна чааһынайдар бииргэ үлэлээһиннэрин (государственно-частное партнерство) түмүгэр тутуллуон сөп. Ол эбэтэр инвестор (чааһынай тэрилтэ эбэтэр биирдиилээн предприниматель) нэһилиэккэ социальнай дьиэни тутан биэрэр, ону кэлин государство атыылаһан ылар.
Байаҕантай нэһилиэгэр тутуу олох барбат диир табыллыбат. Былырыын Кириэс Халдьаайыга 220 миэстэлээх саҥа оскуола үлэҕэ киирэн олохтоохтор махталлара, үөрүүлэрэ муҥура суох. “Оскуолабытыттан барыахпытын баҕарбаппыт, үөрэнэн бүтэн да баран оонньуу хаалабыт”, - дэһэллэр үөрэнээччилэр.
Маны сэргэ нэһилиэнньэ бырабыыталыстыба отчуотун кэмигэр сайыҥҥы суолу оҥорууну, Алдан өрүһү туоруур паром сырыытын, интернет, суотабай сибээс өҥөтүн тупсарары, кииннэммит ититэр тиһик уларыйыан наадатын, олохтоох музей тутуутун, библиотеканы саҥардыыны, почта үлэтин тупсарары туруоруста. “Сберкаасса 0,5 ставкаҕа үлэлиир. Үлэтэ хара баһаам. Тоҕо өрөспүүбүлүкэ үрдүнэн “Сбербаан” үлэһиттэрэ аҕыйаан иһэллэрий? Почта үлэтэ эмиэ оннук. Хаһыаппыт солуна сойбутун кэннэ биирдэ кэлэр”, - диэн эттэ пенсионер Агит Охлопков.
Сибээс миниистирэ Александр Борисов этэринэн, урукку сылларга Дьокуускай куоракка таһаҕас мунньуллан хаалар буоллаҕына, икки самолету ылыахтарыттан почтаны таһыы быдан түргэтээбит. Мантан антах почталар “Город” диэн саҥа программаҕа көһөн туох баар төлөбүрү барытын ылар буолуохтара.
Комментарии
Авторизация на сайте через социальные сети