Куорат олохтоохторун долгутар боппуруостарынан, эрдэ суруллубутун курдук, „Южная“ киин хочуолунай таһаарар хара буруота буолар. Нэһилиэнньэ этиммитин таһынан, бырабыыталыстыба бэрэссэдээтэлэ Г.И.Данчикова аатыгар 500-тэн тахса киһи илии баттааһыннаах көрдөһүүнү туттардылар. Маныаха биир дойдулаахтара, „ОДьКХ“ ГУП генеральнай дириэктэрин солбуйааччы, Ил Түмэн депутата Юрий Садовников аны күһүн үрүҥ буруо унаарыа диэн эрэннэрдэ.
Орто Халыма олохтоохторо ааспыт сылга Галина Иннокентьевна кэлэ сылдьарын саҕана туруорсубут катердарын санаттылар. Урут „Заря“ үс Халыманы уунан сибээстээбитин санаттылар, ыаллыы сытар улуустарга олорор уруу-аймах көрсөрүгэр олус табыгастаах этэ диэн аҕыннылар. Итиниэхэ тырааныспарга уонна суол хаһаайыстыбатыгар миниистири бастакы солбуйааччы М.Р.Никифорова улуус дьаһалтатыгар нэһилиэнньэ сылдьыан сөптөөҕүн дакаастыырыгар сорудахтаата. Кулун тутарга улуус аатыттан туһааннаах докумуон киирдэҕинэ, сөптөөх эппиэти биэриэхпит диэтэ. Маны таһынан куорат олохтоохторун иһэр уу хаачыстыбата долгутарын, сыллата водозабор тутуутун туруорсалларын санаттылар.
Куорат олохтоохторун кытта көрсүһүү кэнниттэн бөлөх үс сиринэн үлэлээтэ. Мин сылдьыспыт бөлөҕүм Бастакы Мээтис уонна Сиэн Күөл нэһилиэктэр олохтоохторун кытта көрүстэ, социальнай объектарынан сырытта, биирдиилээн дьону кытта кэпсэттэ. Бу ыаллыы сытар нэһилиэктэр диэтэххэ, олохторо-дьаһахтара чыҥха атын. Бастакы Мээтис нэһилиэгэр ааспыт сылга 2 эрэ ыал кииннэммит ититэр ситимҥэ холбоммут эбит буоллаҕына, ыаллыы сытар Сиэн Күөл нэһилиэгэр 52 ыал холбоммут. Бары Үлэҕэ уонна социальнай сайдыыга министиэристибэ нөҥүө оҥоһуллар көмө харчынан туһаммыттар. Ол эрээри сорох дьиэлэргэ итии тиийбэт диэн олохтоохтор этиннилэр. Икки нэһилиэккэ баар кыһалҕаны улуустааҕы филиал үөрэтэн көрөрүгэр, ситим сыыһа тардыллыбыта дакаастаннаҕына, өрөмүөн үлэтэ барыа, оттон итии тиийэр эрээри, дьиэ туруга мөлтөҕүттэн буоллаҕына, номнуо тэрилтэ буруйа суоҕа быһаарыллыа диэн ОДьКХ министиирин солбуйааччы Н.Н.Дураев быһаарда.
Олохтоохтор өртөөһүн боппуруоһун күүскэ туруордулар. Былырыын республика үрдүнэн өртөөһүн бобуллубутун ким даҕаны сөбүлүү истибэтэҕэ. Буолаары буолан, Халыма сирэ-уота төгүрүччү уу. Урут уруккуттан илии күүһүнэн күөллэри сүүрдэн, ходуһа сирдэрин оҥостон кэлбит Халыма дьонун оттооһун боппуруоһа олус долгутар. Уһук хоту улууска сүөһүнү тутуу уустуктардааҕа кимиэхэ баҕарар өйдөнөр. Онон олохтоох салалта тус эппиэтинэһи ылынарыгар, өртөөһүн аны бобуллубатыгар көрдөстүлэр.
Салгыы дьон-сэргэ тылга-өскө болҕомтону уурары көрдөстө. Саха киһитэ ханна да буоллун сахалыы саҥарыахтааҕа ыйылынна. Онон инникитин саха нэһилиэгэр тиийэн сахалыы отчуот иһиллэрэ ордук буолуо этэ диэн аһаҕастык санааларын эттилэр.
Комментарии
Авторизация на сайте через социальные сети