Сөҕүөм иһин, сарсыарда 10 эбэтэр 11 чаастан тэриллибит мунньахтарга кытта дьон күргүөмүнэн тоҕо анньан кэлэн сырытта. Ол, бука, тыа сирин олохтоохторо «саҥа миниистирбит хайдах тыллаах-өстөөх, туох өйдөөх -санаалаах салайааччы эбитий» диэн билиэх-көрүөх санаалара баһыйан, кулууп дьиэҕэ атахтара аҕалбытын билиминэ даҕаны хааллылар быһыылаах.
Миниистир хамаандатыгар Таатта улууһун баһылыга Михаил Соров, Ил Түмэн дьокутаата, «Саха» НКИК президенэ Иван Андросов, СӨ баһылыгын уонна бырабыыталыстыбатын дьаһалтатын кадр политикатыгар, судаарыстыбаннай уонна муниципальнай сулууспаҕа департаменын салайааччытын солбуйааччы Степанида Николаева, СӨ Баайга-дуолга уонна сиргэ сыһыаннаһыытын министиэристибэтин сир сыһыаннаһыытыгар департаменын салайааччыта Нюргустана Пахомова, массыына суолун управлениетыттан, сыана политикатын комитетыттан, о.д.а. эппиэттээх үлэһиттэр сырыттылар.
Туораттан иһиттэххэ, миниистир бэйэтинэн кэлэн биэрбитинэн туһанан, ыйытыы, туруорсуу үксэ тыа хаһаайыстыбатыгар туһаайыылаах буолла. Ол ахсын Александр Еремеевич дьон астынар гына чуолкай, сиһилии хоруйдаһан истэ. Алдан нэһилиэгэр 16 бааһынай баар, манна сир тиийбэт буолан, атын нэһилиэктэртэн түүлэһэн оттууллар. Егор Кучуров, Радомир Егасов курдук саҥа хотон туттан, үлэлии-хамныы сатыыр эдэр дьон элбэхтэриттэн миниистир астыммытын биллэрдэ. Ол гынан баран, ааспыт үтүө сылларга күрүө тутуутугар киирсибэккэ хааланнар, элбэҕи сүүйтэрбиттэрин бэлиэтээтэ.
Уус-таатталар иннилэригэр Алдан өрүс кытылын бөҕөргөтүү, сири-уоту үчүгэйдик оҥостуу курдук мүлчүрүйбэт соруктар тураллар. Бөһүөлэк уотун ситимэ 2017 сылга СиП кабельга уларытыллыахтаах. Кэлиҥҥи угут сылларга суол-иис, үрэхтэри туоруур элбэх күргэ алдьанан, дьон айаҥҥа эрэйи көрсөр. Иван Бочонин суолу тутар тэрилтэтэ көрүллүбүт үп иһинэн үлэни ыытар. Мотуордаах оҥочо ананан кэлэн иһэн, аара ханна халыйбыта биллибэккэ хаалбыта, мелиоратордар уу түһэттэрэ ыыппыт тыраахтардара алдьанан турара ахтылынна.
Кэпсэтиигэ саас-күһүн өртөөһүнү эппиэтинэс ылынан тэрээһиннээхтик ыытарга, тыа хаһаайыстыбатын табаарын оҥорооччулары хонтуруоллуур, сүбэ-ама, ыйыы-кэрдии биэрэр ревизордары элбэтэргэ, ыаллар дьиэлэрин кииннэммит ититиигэ сэниэлээхтик киллэрэн иһэргэ эбэтэр кырдьаҕас дьоҥҥо анаан уопсай дьиэлэри тутарга, бырабыыталыстыба үлэтин отчуотунан муҥурдаммакка, отчуот-ырытыы киэбинэн ыытарга этиилэри киллэрдилэр. Алдан курдук улахан нэһилиэккэ 100 миэстэлээх оҕо садын дьиэтэ тутулларын туруорустулар.
Уус-таатталарга быйыл үбүлүөйдээх сыл: биир дойдулаахтара, суруйааччы Н.Д.Неустроев 120 сылын улуус, өрөспүүбүлүкэ таһымнарыгар киэҥник бэлиэтииргэ бэлэмнэнэллэр. Олохтоох агрооскуола дириэктэрэ былырыын 20 сүөһүнү атыылаһан баран, субсидия төлөммөккө, аҥарын төннөрбүттэрин этиннэ. Миниистир түмүк тылыгар: «Эһиги сыл аайы 2 мөл. солкуобайы ылаҕыт, ону бөһүөлэги тупсарыыга көдьүүстээхтик туһаныҥ. Тыа сиригэр ыччат үлэлии сатыыра үчүгэй. Агро-оскуолаҕыт сөптөөх хайысханан үлэлиир. Уус-Таатта оҕото үөрэхтээх, тыа хаһаайыстыбатыгар чугас буоларыгар баҕарабын», – диэтэ.
Комментарии
Авторизация на сайте через социальные сети