Бастакы этээскэ — оҕо саада үлэлиир, онно 80 кырачаан сылдьар. Иккис мэндиэмэҥҥэ – оскуола оҕолоро, үһүскэ – аграрнай техникум үөрэнээччилэрэүөрэнэллэр. Онон ситэриилээх былаас отчуотугар Одьулуун нэһилиэгин олохтоохторун биир сүрүн туруорсар боппуруостарынан оҕо саадын тутууну түргэтэтии буолла.
Правительственнай бөлөҕү салайбыт үлэ уонна социальнай сайдыы миниистирин солбуйааччы Оксана Винокуроваоҕо саадыгар сырытта. Кырдьык, усулуобуйа олох суох сирэ эбит: бөлөх аайы оҕо биир хоско оонньуур, онно аһыыр, онно утуйар. Иитээччилэр улахан эрэллэрэ – “Скрыбыкин боротокуола”. Ол эбэтэр халаан уутун кэмигэр Одьулууннааҕы оҕо саада улаханнык эмсэҕэлээбитин туһунан олохтоохтор уопсай мунньахтарын боротокуолугар саҥа оҕо саадын тутар туһунан анал пууну киллэрэн бигэргэттэрбиттэр. Онон бу докумуоҥҥа олоҕуран, улуус дьаһалтатын баһылыга Андрей Ноговицын оҕо саадын боппуруоһун быһаарарга анаан СӨ Бырабыытылыстыбатын бэрэссэдээтэлэ Галина Данчикова аатыгар официальнай сурук ыыппыт.
Ситэриилээх былаас отчуоттуур мунньаҕын түмүгэр үлэ уонна социальнай сайдыы миниистирин солбуйааччы Оксана Винокурова: “Россия президенэ Владимир Путин ыам ыйынааҕы ыйааҕынан 2018 сылга диэри оҕо саадын боппуруоһа быһаарыллыахтаах. Билигин өрөспүүбүлүкэ салалтата үбүлээһини тобулар үлэни ыытар. Бюджекка үп тийбэтинэн сибээстээн, Дьокуускайга государственнай-чааһынай бииргэ үлэлээһин хайысхатынан үлэ ыытыллар. Оттон Одьулууннааҕы оҕо саадын боппуруоһа ураты быһыыттан-майгыттан - халаан содулуттан тахсыбыт проблема. Мин бэйэм оҕо саадыгар кырачааннар уустук усулуобуйаҕа сылдьалларын илэ харахпынан көрдүм. Оҕо саадын тутуутун туруорсууну сөптөөҕүнэн сыаналаан, Чурапчы улууһуттан киирбит биир суолталаах ирдэбил курдук ылынан, бу боппуруоһу сүрүн пуун быһыытынан тустаах боротокуолга киллэриэхпит”, -- диэн эттэ.
Онон ситэриилээх былаас отчуотун кэнниттэн одьулууннар: “Кыһалҕабыт быһаарыллыыта дьэ оннуттан олохтоохтук хамсыыр ини”, - диэн эрэх-турах санаалаах хааллылар.
Хаартыскаларга: Оҕо саадын иитиллээччилэрэ биир хоско аһыыллар, утуйаллар уонна оонньууллар.
Комментарии
Авторизация на сайте через социальные сети