Отчуоту тыа хаһаайыстыбатын уонна ас-үөл политикатын министрэ Александр Артемьев оҥордо. Киирбит ыйытыыларга дакылаатчыт уонна туһааннаах салайааччылар дьон астынар гына сиһилии хоруйдаатылар.
Олохтоохтор сүнньүнэн электрическэй уот, айылҕа гааһын кыамтатын улаатыннарыыны, Дьокуускай-Нам суолун оҥорууну, асфальтааһыны, улуус киинигэр культура дыбарыаһын, учууталларга, тыыл ветераннарыгар, культура үлэһиттэригэр уопсай дьиэни, үөрэнээччилэр, спортсменнар олорор интернат дьиэлэрин тутууну, Үөдэй уонна Граф Биэрэгин даамбаларын оҥорууга эбии үбүлээһини көрүүнү, иһэр уу боппуруоһун олохтоохтук быһаарыыны, Тараҕана уутун түһэриигэ барыахтаах үлэни ситэттэриини, элбэх оҕолоох ыалларга бэриллибит учаастактар баар кварталларыгар уот, гаас ситимнэрэ тардыллыытын туруорустулар, улууска худуоһунньуктар айымньыларын музейа, быыстапка саалата суоҕа этилиннэ.
Улуус баһылыга А.П. Атласов улуус бэйэтин күүһүнэн туох үлэни ыытарын иһитиннэрэн туран, Хатыҥ Арыы "Озернай" кварталыгар, Үөдэй, Граф Биэрэгэр баар даамбалары бөҕөргөтүүгэ эбии үбүлээһини көрүүнү, улууһу гааһынан, электроэнергиянан толору хааччыйыыга уустук балаһыанньа үөскээри турарын болҕомто киинигэр ылары, ону таһаарбат дьаһаллары ылары, үбүлүүрү туруоруста.
Александр Еремеевич түмүк тылыгар: "СР правительствота бэйэтигэр ылыммыт социальнай эбэһээтэлистибэлэрин булгуччу толоруоҕа. Кризис кэллэ диэн аһара долгуйар табыллыбат. Сир үлэтин, сүөһү иитиитин атаҕар туруоран Дьокуускай ырыынагын толоруохтааххыт. Бурдугу ыһыы иэнин 1000 гектарга диэри улаатыннарыҥ. Элбэх боппуруоска буксуйуу баар. Бары түмсүүлээхтик, турунан төрүт дьарыктарбытынан үчүгэйдик, сөптөөхтүк дьаһанан, илиини ыһыктыбакка үлэлиэхпитин наада. Тыа хаһаайыстыбатыгар ыччат сыстан үлэлииригэр күүскэ ылсыахха наада. Билиҥҥи сыыппаралар барыбытын дьиксиннэрэллэр. Балаһыанньаны тосту көннөрөр туһугар бары биир санаанан үлэлиэхтээхпит", -- диэн эттэ.
Мунньахха кыттыыны ылбыт олохтоохтор уонна нэһилиэктэр бэрэстэбиитэллэрэ республика ситэриилээх былааһын үлэтин биһирээтилэр.
Комментарии
Авторизация на сайте через социальные сети