- Валерий Жондоров ааспыт сыллааҕы үлэ түмүгүн туһунан кылгастык отчуоттаата. Ол кэнниттэн олохтоохтор туруорсар, интэриэһиргиир ыйытыыларын биэрэн, кэпсэтиини салҕаатылар. Элбэх боппуруос ОДьКХ уонна энергетика миниистирэАлексей Колодезников аатыгар киирдэ.
- Василий Ребров: «Эһиги манна кэлбиккититтэн олус диэн үөрэбит. Объектаргытын көрдүгүт, саҥа тутуллубут хочуолунайбыт үчүгэйдик үлэлии турар. Ол үрдүнэн биһиги хомойорбут диэн - хочуолунайбыт кыаҕын ситэ туһаммаппыт. Биһиги, бөһүөлэк уһугар олорор дьон, кииннэммит ититэр тиһиккэ кыайан холбоммокко олоробут. Быйыл чааһынай ыаллары тиһиккэ холбуур боппуруоһу быһааран бараргытыгар көрдөһөбүт. Онуоха наадалаах матырыйааллары олохтоох дьаһалта көмөтүнэн Дьокуускайга ылларбыппыт, ону баһылык аҕалтарара эрэ хаалла. Кыһыҥҥы суол сабыллыар диэри матырыйаал кэлиэхтээх, холбонорго бэлэм олоробут», -диэтэ.
- Бу боппуруоска Алексей Зосимович маннык эппиэттээтэ: "Хочуолунайы көрдүм, туруга үчүгэй, түөрт хочуол үлэлии турар. Хаалбыт дьиэ барыта холбонуо диэн билигин этэр кыаҕым суох. Баһылыгы кытта сметаны, докумуоннары көрүөхпүт. Тиийиммэттэргэ холбонууга социальнай харалтаттан субсидия көрүллэр. Дьиэҕит докумуоннара ситэ оҥоһулла илик буоллаҕына, кытаатыҥ, тиэтэйиҥ. Дьиэ докумуона суох ититэр ситимҥэ холбонор уонна субсидиянан туһанар кыаххыт суох. Матырыйаал кыһыҥҥы суолунан кэлиэн наада. Холбонуохтаах дьиэлэри барытын холбуу сатыахпыт. Биир нэдиэлэ иһинэн ханнык дьиэлэр холбоноллорун этиэхпит.
- Дизельнэй станцияҕа сырттым. Быйыл дизгенераторы уларыппыппыт. Саҥа станция тутуутун 2017 сылга былааннаатыбыт».
- Маны таһынан олохтоохтор хочуолунай үлэһиттэрин хамнастара намыһаҕын, спортивнай саала өрөмүөнүн, өртөөһүн боппуруоһун, балыыһаҕа оҕо бырааһа суоҕун, улуус киинигэр баан үлэтэ куһаҕанын, сибээс мөлтөҕүн, оскуолаҕа итии аһылыгынан оҕолору хаччыйыыга үбүлээһин кыратын эттилэр. Отчуоттуур биригээдэҕэ тыа хаһаайыстыбатын бэрэстэбиитэлэ суоҕун хомойон бэлиэтээтилэр.
- Көрсүһүүгэ нэһилиэк куратора Иван Соломов кытынна.
- Нэһилиэк олохтоохторо правительство 2014 сыллааҕы үлэтин биһирииллэрин биллэрдилэр.
При частичном или полном использовании материалов гиперссылка на сайт ysia.ru обязательна.
Комментарии
Авторизация на сайте через социальные сети