Ол курдук, Томтор нэһилиэгин олохтооҕо Мария Винокурова оҕото ыалдьан, улуус киинигэр барбакка, ыксаан куоракка торакальнай хирургияҕа эпэрээссийэлэммитин, ол кэннэ дойдутугар кэлэн, балыыһаҕа эмп-томп суоҕуттан, салгыы эмтэниитэ уустугурбутун, онно эбии перотониттаан, иккистээн эпирээсийэлээнээри улуус киинигэр айаннаан иһэн тарыҥҥа хаайтаран, төннөргө күһэллибиттэрин кэпсээтэ. Иһиттэххэ дөбөҥүн иһин, ийэ барахсан маннык уустук балаһыанньаҕа түбэһиитэ, кырдьык да, дууһа кыланыытыгар тэҥнээх. Ол иһин Мария Николаевна олохтоохтор ааттарыттан Томторго аныгы медицинскэй тэрилинэн толору хааччыллыбыт балыыһаны тутарга туруоруста. "Бэйэбит балыыһабытыгар эмтэнэрбитигэр анализ да туттарар кыахпыт суох - барыта илиинэн оҥоһуллар. Куоракка бараары гыннахха, манна оҥорторбут анализтарбытын билиммэттэр. Хаттаан барарга күһэллэбит. Күүстээх эмтэри үстүү ый иһэбит да, ол эмпит туох түмүктээҕин аналиһа суох билбэппит. Онон бу боппуруос эмиэ сөптөөхтүк быһаарыллыан наада", - диэн эттэ Мария Винокурова.

Уус-Ньараҕа улуус мунньаҕын депутата, предприниматель Андрей Марков рентген суоҕуттан ыарыһах куораттыырга күһэллэрин этэн туран, саамай наадалаах аппараты үлэлэтэргэ көрдөстө. Маны таһынан улуус киинигэр инфекционнай балыыһа дьиэтэ сууллар кутталлааҕын, онон манна болҕомтону уурары эттилэр, Биэрэк Үрдүгэр фельшерскэй-акушерскай пууну аһарга туруорустулар.

Биллэн турар, бу кыһалҕалары быһаарыыга улуус кылаабынай бырааһа Владимир Коголь үлэлэһэрэ чахчы. Кини кулун тутар бүтэһигэр быраастар бөлөхтөрө анал диагностикалыыр-чинчийэр аппарааттардаах Томторго кэлэн олохтоохтору көрүөхтэрэ-истиэхтэрэ диэтэ. Дьон-сэргэ сүрүннээн онколог бырааһы кэтэһэр эбит. Кырдьык, эмчит суоҕуттан хас да сылы быһа "кыралаан ыалдьар" дьон туох ыарыыга ылларан сылдьалларын ким билиэй? Кылаабынай быраас: "Эмчиттэр көрбүттэрин кэннэ, "салгыы көрдөрүнэллэрэ наада" диэбит дьоннорун улуус баһылыгын кытта сүбэлэһэн баран Уус-Ньараҕа аҕалан, анал медицинскэй аппарааттарга ыйыллыбыт ыарыыларыгар олохтоох чинчийиини ыытыахпыт", -- диэн эрэннэрдэ.

Оттон саҥа балыыһаны тутуу анал программатҕа киирбэтэх буолан, чугастааҕы сылларга тутар кыах суох диэн эттилэр. Улуустааҕы киин балыыһа бырааһа быһаарбытынан, сотору кэминэн Томтор балыыһатыгар анал исписэлиис кэлэн медтехниканы инвентаризациялыаҕа. "Туһаттан тахсыбыттары "списаниелаан", аныгы ирдэбилгэ эппиэттиир тэриллэринэн саҥардыахпыт", -- диэн эрэннэрдэ.

Иккис улахан проблема -- хочуолунай боппуруоһа. Сордоҥноохтор былырыын үлэҕэ киллэрбит хочуолунайдарын хочуоллара урут туттулла сылдьыбыт, эргэ буолан биэрбиттэр. Онон сотору-сотору өрөмүөннэнэллэр эбит. "Кириисис иннинэ киирбитигэр баһыыба!" -- диэбит курдук буолла. Ол эбэтэр модульнай хочуолунайы чааһынай тэрилтэ бэйэтин үбүнэн туттарбыт. "Кылаабынайа, бэрт ыксалынан да буоллар, хочуолунай үлэҕэ киирдэ. Быйыл сайын икки саҥа хочуолу аҕалан туруоруохпут", -- диэн эрэннэрдилэр коммунальнай хаһаайыстыба эппиэттээх салайааччылара.

Маны сэргэ сордоҥноохторго өссө биир кыһалҕа баар эбит - ититии турбаларын тиһиктэрэ сыыһа тардыллыбыттар. Бырайыагы оҥорооччулар күһүн турба тардыллан, үлэҕэ киирээри турдаҕына кэлэн: "Сыыһа тарпыккыт", - диэбиттэр. Онон бу боппуруос эмиэ быһаарыыны эрэйэр.

Өймөкөөн улууһун олохтоохторо ити курдук транспорт уонна суол хаһаайыстыбатын миниистирэ Сергей Винокуров салайааччылаах отчуоттуур бөлөҕүн иннигэр кыһалҕаларын туруорсан, бэйэлэрин истэригэр "буһара" сылдьыбыт санааларын үллэстэн, ирэ-хоро кэпсэтэн тарҕастылар. Кылаабынайа, туруорсар боппуруостара быһаарылларыгар олук уурулунна.