«Былырыын водозаборга саахал тахсан, тымныы уута суох олорбуппут. Ууну ыраастааһын быстар мөлтөх. Онтубут хаһан оҥоһуллуоҕай?», - диэн ыйыталлар Хаандыга олохтоохторо. Ону сэргэ ОДьКХ үлэһитин хамнаһа олус кыратын, былырыын үлэ миэстэтин сарбыйыы түмүгэр биир үлэһит икки үлэни толорорун, онуоха хамнаһа үрдээбэтэҕин бэлиэтииллэр.
Коммунальнай хаһаайыстыбаҕа сыһыаннаах боппуруостар атын нэһилиэктэргэ эмиэ көтөҕүлүннүлэр. Холобур, Байаҕантай нэһилиэгин олохтоохторо кииннэммит ититэр тиһиккэ чааһынай дьиэлэри холбооһуну ыйыталаһаллар. Дьабарыкы Хайа олохтоохторо балыыһаҕа саҥа хочуолунай тутуутун, киин ититэр систиэмэни тардыыны туруорустулар, коммунальнай өҥө төлөбүрүн, чуолаан капитальнай өрөмүөн харчытын, тоҕо «Энергосбытка» төлүүллэрин туоһуластылар.
Маны сэргэ олохтоохтор «Өрөспүүбүлүкэни сылааһынан хааччыйа олоробут эрээри, дьиэлэрбит тоҕо тымныыларый» диэн боппуруос туруораллар. Санатан эттэххэ, Дьабарыкы Хайа шахтата таас чоҕунан өрөспүүбүлүкэни барытын кэриэтэ хааччыйан олорор. Холобура, былырыын манна 320,1 тыһ. тонна таас чох хостоммута. Ити быһа барыллаан өрөспүүбүлүкэ таас чоххо наадыйыытын барытын кэриэтэ сабар.
Онон түмүккэ улуус олохтоохторо олох-дьаһах, коммунальнай хаһаайыстыбаҕа боппуруос мунньуллубутунан сибээстээн, Хаандыгаҕа ОДьКХ уонна энергетика министиэристибэтэ тахсан улахан мунньах ыытара буоллар диэн баҕа санааларын тириэрдэллэр.
Комментарии
Авторизация на сайте через социальные сети