“Бырааспыт суох. Кинини сиэстэрэ солбуйа сылдьар. Ким да үлэлии кэлиэн баҕарбат”, - диэн эттилэр олохтоохтор ситэриилээх былаас нэһилиэнньэҕэ отчуотун кэмигэр. Санатан эттэххэ, Өлүөхүмэ улууһугар бырабыыталыстыба бэрэссэдээтэлин бастакы солбуйааччы Петр Алексеев салайааччылаах бөлөх нэһилиэнньэҕэ отчуоттуу сылдьар.
Саҥыйахтаах учаастактааҕы балыыһата үс сэлиэнньэни - Малыкааны, Марханы уонна Саҥыйахтааҕы - хабар. Малыкааҥҥа, Мархаҕа фелдьшерскэй-акушерскай пууннар бааллар. Ол эрээри олохтоохтор үксүн балыыһаҕа наадыйан, нэһилиэк киинигэр Саҥыйахтаахха киирэллэр эбит. Маны сэргэ Малыкааҥҥа фелдьшер, Хоро нэһилиэгэр быраас суох буолан, олохтоохтор бу кыһыны быһа эрэйдэммиттэр.
Доруобуйа харыстабылын министиэристибэтин бэрэстэбиитэлэ этэринэн, бу нэһилиэктэргэ ХИФУ медицинскэй институтун быйылгы выпускниктара үлэлии кэлиэхтэрин эбэтэр медик идэлээх олохтоох үлэһиттэр бөһүөлэктэн бөһүөлэккэ сыҕарыйан биэриэхтэрин сөп эбит. Холобура, Малыкааҥҥа фелдьшербит суох диир буоллахтарына, ыаллыы сытар Марха бөһүөлэгэр үс фелдьшер олорор. Кинилэртэн биирдэстэрэ Малыкааҥҥа хайа баҕарар кэлэн үлэлиэн сөп.
Доруобуйа харыстабылыгар сыһыаран, бу нэһилиэктэр олохтоохторо, чуолаан оскуола тех-үлэһиттэрэ, тыа хаһаайыстыбатын үлэһиттэрэ, сылга биирдэ хайаан да барыахтаах медицинскэй көрүүнү улуус киинигэр киирэн ааһар кыахтара суоҕун этэллэр. “Хамнаспыт наһаа кыра. Ол сыыһын барытын Өлүөхүмэҕэ киирэр айан төлөбүрэ оҥостобут. Саҥыйахтаахха быраастар таҕыстахтарына, доруобуйабытын көрдөрүнэрбитин таһынан үлэҕэ ирдэниллэр мед-көрүүнү барарбыт сатаммат дуо? Харчытын төлүө этибит”, - дииллэр малыкааннар.
Комментарии
Авторизация на сайте через социальные сети