Саҥа дьиэни «Авангард» ХЭО сыл иһигэр тутан үлэҕэ киллэрдэ, онон олохтоохтор эргэ дьиэттэн саҥа дьиэҕэ көһөннөр республика Правительствотыгар, оройуон салалтатыгар махталлара улахан. Алгысчыт Петр Тихонов оҕо саҥата үксүүрүгэр, ыаллар нус-хас олороллоругар көрдөһөн аал уоту оттон алгыс сиэрин-туомун толордо.

Оройуон салалтатыттан баһылыгы бастакы солбуйааччы Павел Сазонов олохтоохтор үөрүүлэрин үллэһиннэ. 2017 сылга диэри «Хаарбах дьиэ» программа салҕанан барыаҕын, Табаҕаҕа, Хаптаҕайга, Павловскайга, Аллараа Бэстээххэ, Төхтүргэ таас дьиэлэр тутулла туралларын иһитиннэрдэ. Хара нэһилиэгин баһылыга Дария Назарова нэһилиэккэ инникитин Үрдьүҥэхтээх кыбаарталга Тыа хаһаайыстыбатын министерствотын нөҥүө агрокластер тэрийэргэ федеральнай программанан үлэлэһэргэ кэпсэтиһии ыытылларын эттэ, онон нэһилиэк салгыы сайдар кэскиллээҕин бэлиэтээтэ уонна Махтал суруктары тутааччыларга туттартаата.

Саҥа дьиэ күлүүһүн Константин Ширяев, Зинаида Платонова, Денис Григорьев, Николай Павлов, Лена Семенова, Туйаара Орлова, Ольга Габышева, Семен Сидоров дьиэ кэргэттэрэ туттулар. Олохтоохтор ааттарыттан Ольга Габышева саҥа дьиэҕэ киирии курдук олохторугар биирдэ эмэ көрсөр үөрүүгэ тиксибиттэриттэн, сэриигэ баран охтубут чугас дьонун баҕа санаалара туолан, эйэлээх олоххо сырдык, ыраас дьиэлэммиттэриттэн үөрбүтүн эттэ.

Саҥа дьиэ символическай күлүүһүн «Авангард» ХЭО тутуу тэрилтэтин салайааччыта Николай Шишигин Дария Назароваҕа үөрүүлээх быһыыга-майгыга туттарда.