Күөх Ньурбаҕа Култуура министиэристибэтин күннэрэ ыытылынна

Кулун тутар 17-21 күннэригэр Ньурба улууһугар СР Култуураҕа уонна духуобунай сайдыыга министиэристибэтин күннэрэ бэрт тэрээһиннээхтик ыытылынна. Манна Дьокуускайтан култуура араас тэрилтэлэрин салайааччылара, артыыстар, музыканнар, суруйааччылар, худуоһунньуктар, барыта сүүстэн тахса киһилээх делегация кыттыыны ылла.


СР култуураҕа уонна духуобунай сайдыыга миниистирэ Владимир Тихоновы уонна Дьокуускайтан ыҥырыллан кэлбит күндү ыалдьыттары Олоҥхо дьиэтигэр алгысчыт аал уот оттон алҕаан көрүстэ, сахалыы таҥастаах кыргыттар чороонноох кымыһынан, алаадьынан, үтэһэлээх этинэн күндүлээтилэр.
Миниистир Владимир Тихонов уонна Ньурба улууһун баһылыга Борис Попов мустубут дьону эҕэрдэлээн тыл эттилэр. Инникитин бииргэ үлэлиир туһунан дуогабарга илии баттаһыах буоллулар. Онтон оһуокайга ыҥырдылар. Ол кэнниттэн Ньурбаттан төрүттээх худуоһунньук Николай Иннокентьев быыстапкатын үөрүүлээхтик аһыы буолла. Күнүс оптуобуска олордон Ньурба кэрэхсэбиллээх историческай миэстэлэригэр сырытыннардылар уонна К.Д. Уткин аатынан музейы көрдөрдүлэр.

Киэһэ «Кыталык» Култуура дьиэтигэр буолбут тэрээһини үөрүүлээхтик арыйыыга миниистир Владимир Тихонов Дьокуускайтан улахан делегация Ньурба сиригэр кэлиитэ манна култуура сайдарыгар дьоһун хамсааһыны таһаарыаҕар эрэнэрин эттэ.
Россия Суруйааччыларын союһун чилиэнэ Уйбаан Ойуур мустубут дьонубыйыл дойдуга ыытыллар Литература сылынан эҕэрдэлээтэ, инникитин да суруйааччылар уонна «Чолбон» сурунаал редакцията култууура үлэһиттэрин кытта бииргэ саха литературатын киэҥ араҥаҕа сырдатарга бэлэмнэрин бэлиэтээтэ.


Суорун Омоллоон аатынан Опера уонна балет театрын солистара Валерий Касаткин, Анна Дьячковская, балерина Екатерина Тайшина, Музыка үрдүкү оскуолатын үөрэнээччилэрэ Айта Сивцева, Алеша Пестерев кыттыылаах улахан кэнсиэр үрдүк таһымнаахтык ааста, көрөөччүлэр биһирэбиллэрин ылла.

Култуура миниистирин солбуйааччы Николай Макаров уонна Опера уонна балет театрын дириэктэрэ Сергей Сюльскай салайар айар бөлөхтөрө Ньурба нэһилиэктэринэн сырытта. Култуура уонна искусство үлэһиттэрин кытта көрсүһүүлэр, кэнсиэрдэр, араас тиэмэҕэ семинардар, маастар кылаастар уонна «төгүрүк остуоллар» ыытылыннылар.
Олохтоохтор маннык тэрээһиннэр олус туһалаахтарын, эдэрдиин-эмэнниин кэрэхсээбиттэрин эттилэр, инникитин да ситимнээхтик ыытылла туралларыгар баҕа санааларын тиэртилэр.