Күрэхтэһии Ньурба 2 №-дээх орто оскуолатын спортивнай саалатыгар буолла. Манна саҥа саҕалааччылар, уһуйаан кырачаан иитиллээччилэрэ уонна оҕо искусствотын оскуолатын хореографияҕа уонна спортивнай-бальнай үҥкүүгэ куруһуоктарыгар дьарыктанар үөрэнээччилэр хас да программанан күрэс былдьастылар.

Быйылгы күрэс сүрүн уратытынан уһуйаан иитиллээччилэрин кыттыылара буолла. Ол курдук, Ньурба куорат «Кэскил», «Кыталык», «Родничок», «Аленушка» уонна Октябрьскай нэһилиэк «Биһик» оҕо саадтарын кырачаан үҥкүүһүттэрэ сатабылларын көрдөрдүлэр.

Спортивнай бальнай үҥкүү күрэһин хаһыс да сылын искусство оскуолатын преподователэ, «Валерия» үҥкүү ансаамбылын салайааччыта Наталья Саввинова тэрийэн ыытар. Дьүүллүүр сүбэҕэ Ньурбатааҕы оҕо искусствотын оскуолатын идэтийбит, опыттаах хореографтара үлэлээтилэр. Урукку сылларга маннык тэрээһиҥҥэ элбээбитэ 30 паара кыттар эбит буоллаҕына, быйыл кыттааччы ахсаана лаппа элбээн, 75 паара күрэстэстэ.

Ньурба оройуонугар бу курдук спортивнай бальнай үҥкүү сайдар уонна тэнийэр. Онон кэлэр да сылларга хатыламмат кэрэ түгэни бэлэхтиир үҥкүү күрэһэ салҕанан ыытылла туруо буоллаҕа.