Манна 11.00 ч. киэһэ 16.00 ч. диэри быйылгы эстафета уус-уран самодеятельноһын лауреаттара - коллективнай ырыа, үҥкүү, фольклор ансаамбыллара, биирдиилээн толорооччулар нэһилиэктэртэн киирэн ырыаны-тойугу тардан кэбистилэр. Улуус баһылыга Н.П.Старостин, СР ааҕар-суоттуур палаататын аудиторыгар, “Дойду ситимэ” түмсүү салайааччыта В.И.Птицын, Ил Түмэн тутуу, ОДьКХ комитетын председателэ А.А.Романов бэйэлэрин эҕэрдэлэрин тириэртилэр. Эстафета кэнсиэрин уонна спортивнай күрэхтэһиилэрин түмүгүнэн 3 бөлөҕүнэн бастыҥнарга анал дипломнары улуус культураҕа уонна духуобунай сайдыыга управлениетын начальнига С.М.Холмогоров уонна спорт уонна физическай культура управлениетын начальнига А.Р.Брызгалов үөрүүлээх быһыыга-майгыга туттардылар. Салгыы 31 нэһилиэк баһылыктара инники күөҥҥэ сылдьар, үөрэххэ үрдүк көрдөрүүлээх талааннаах, бастыҥ ыччаттарыгар, устудьуон-аймахха анал стипендияларын анаатылар. Улуус баһылыга Н.П.Старостин анал стипенедиятын ФЭИ 2-с курсун студеныгар, республикатааҕы ыччат ыһыаҕын “Боотурдар оонньуулара” күөн-күрэс кыайыылааҕар Петр Ивановка туттарда. Маны таһынан улуустан төрүттээх ытык дьоммут эмиэ анал стипендияларын туттарыылара ытыс дохсун тыаһынан арыалланнна.

Үп-харчы, экономика салаатыгар, “Алмазэргиэнбаан” ААО председателэ Л.В.Николаева, культура уонна духуобунай сайдыы салаатыгар СР культуратын үтүөлээх артыыһа, “Сахафильм” ген.директора С.Н.Сивцев-Доллу, доруобуйа салаатыгар мед.наука доктора, профессор В.Г.Игнатьев, үөрэҕирии салаатыгар, СР норуот хаһаайыстыбатын үтүөлээх үлэһитэ А.Е.Сергучев, тыа хаһаайыстыбатын салаатыгар, СР тыа хаһаайыстыбатын уонна аска-үөлгэ полиикатын министрин солбуйааччы С.С.Потапов, тутуу уонна архитектура салаатыгар “Адгезия” ХЭТ салайааччыта М.Ф. Охлопкова, быраап салаатыгар СР юстиция госкомитетын председателэ С.М.Гурьева, журналистика салаатыгар “Саха” НКИК дирекциятын салайааччы О.О.Марков, филология салаатыгар техническай наука доктора, РФ Наукаларын Академятын Саха сиринээҕи научнай киинин президиумун председателэ М.П.Лебедев, общественнай хамсааһын салаатыгар СР Ил Түмэн сис комитетын салайааччы Ю.П.Баишев хайысхаларынан бастыҥ, ситиһиилээх студеннарга бэйэлэрин анал стипендияларын туттардылар.

Бу күн, кулун тутар 20 күнүгэр, киэһэ 19.00 ч. Саха государственнай циркэ дьиэтигэр бу бэлиэ даталарга анаммыт РФ, СР культуратын үтүөлээх үлэһитэ, “Душа России” лауреата Василий Винокуров режиссуратынан туруоруллубут театрализованнай дьүһүйүү кэнсиэрэ 2 түһүмэҕинэн киэҥ далааһыннаахтык ыытылынна. Ол курдук, кэнсиэр бастакы чааһыгар гражданскай сэрии, Аҕа дойду Улуу сэриитэ Литература сылын дьүөрэлээн сырдатылынна. Манна дьөһөгөй оҕолоро, аттар хото туһаныллыбыттара уопсай тэрээһини сэргэхситтэ. Киэҥник биллэр олоҥхоһуппут Петр Максимов аты миинэн олорон, хаамтара сылдьан олоҥхолоообута сонуннук көһүннэ. Бу күн үөрүүлээх түгэнинэн үгэс курдук 59-с культура уонна спорт эстафетатын бастыҥнарын чиэстээһин, наҕараадалааһын ыытылынна. Улуус баһылыга Н.П.Старостин, улуус депутаттарын мунньаҕын сэбиэтин председателэ А.М.Находкин кыайыылаахтарга анал дипломнары, харчынан сертификаттары уонна Эстафета символа бэлиэлээх үрүҥ көмүстэн оҥоһуллубут статуэткалары туттардылар. Бу күн улуус киэн туттар олоҥхоһутугар, ытыктанар алгысчыппытыгар А.М.Захаровка улуус социальнай-экономическай сайдыытыгар кылаатын учуоттаан “Манчаары дойдута-мин дойдум” диэн үрүҥ көмүстэн моойго кэтиллэр анал бэлиэни кэтэтппиттэрин кэлбит дьон уруйдуу көрүстүлэр. Ону тэҥэ «Мэҥэ аат» өйдөбүнньүк мэтээли доруобуйа харыстабылыгар эҥкилэ суох үлэлээбит СР доруобуйа харыстабылын министрин солбуйааччыта А.Н.Григорьева тутта. Маны таһынан хайысхаларынан ааспыт сыл түмүгүнэн бастыҥ көрдөрүүлээх үлэһиттэри чиэстээтилэр-бочуоттаатылар.

Циркэ дьиэтин толору мустубут көрөөччү бу кэнсиэртэн дуоһуйууну ылла. Бу күн киирбит үп Улуу Кыайыы сылыгар анаан Аллараа Бэстээххэ тутуллар Кыайыы монуменыгар уонна сахалартан бастакы Советскай Союз Геройун аатын сүкпүт Ф.К.Попов пааматынньыгын оҥорууга ананыаҕа.

Иккис күн, кулун тутар 21 күнүгэр, П.А.Ойуунускай аатынан Саха академическай театрын саалатын толору мустубут көрөөччүлэргэ «Ый суола» тыыннаах музыка бөлөҕүн доҕуһуолугар Уля Сергучева-Күннэй, Гоша Васильев – Саас Устар ырыаларын-тойуктарын бэлэх ууннулар. Мэҥэ улууһуттан сыдьааннаах эдэр кэскиллээх ырыаһыттарбыт бу дьоро күн бэйэлэрэ айбыт саҥа ырыаларын иһтиннэрдилэр, сэҥээриини ыллылар.

Кулун тутар 23 күнүгэр А.Е.Кулаковскай–Өксөкүлээх Өлөксөй аатынан норуоттар доҕордоһууларын дьиэтигэр “Табаҕалар ыллыылллар” диэн Тараҕай нэһилиэгин уус-уран самодеятельноһын кэнсиэрэ өрө көтөҕүллүүлээхтик ааста. Маны саала иһин толору кэлбит көрөөччүлэр хас нүөмэр ахсын дохсун ытыс тыаһын бэлэхтээбиттэрэ туоһулуур. Бу кэнсиэргэ оҕо саадын иитиллээччилэриттэн саҕалаан аҕам көлүөнэ ырыаһыттары бэлэмнээбит киһинэн СР культуратын үтүөлээх үлэһитэ, “Төлөн” эр дьон народнай ансаамбылын салайааччытын Павел Егоровы бэлиэтиир тоҕоостоох.

Чахчы ырыа куттаах Табаҕалар хомуһуннаах хоһоонунан, ыллам ырыаларынан, сэргэх үҥкүүлэринэн Мэҥэ-Хаҥалас күннэрин ньиргиччи түмүктээтилэр. Күүстээх үлэҕэ, саҥа ситиһиилэргэ кынаттаатылар.