Ил Дархан Егор Борисов сөмөлүөттэн түһээт Баатаҕай Алыытын киин ититэр хочуолунайыгар сырытта. ГУП ОДьКХ Эбээн-Бытантайдааҕы филиалын дириэктэрэ Гаврил Горохов хочуолунай туругун, төһө дьиэни, тэрилтэни сылытарын сиһилии кэпсээтэ. Хочуолунайга өссө дьиэлэри холбуоҕу кыамтата тиийбэтин, былаан быһыытынан саҥа оскуола тутуллуутугар саҥа хочуолунай тэҥҥэ тутуллан киириэхтээх этэ диэн кини быһааран биэрдэ. Улуус баһылыга Иван Горохов хочуолунай тутуллуохтаах сирин көрдөрдө уонна бырайыага толору бэлэмин эттэ. Салгыы Егор Борисов хочуолунайы көрөн баран, ол онно үлэлиир Мичил Слепцову, Егор Стручкову кытта кэпсэттэ. Төһө хамнаһы аахсалларын, үлэлиир усулуобуйаларын, хочуолунай туруга хайдаҕын, иллэҥ кэмнэригэр тугунан дьарыктаналларын ыйыталаста. ГУП ОДьКХ салайааччыта Александр Ноговицын от ыйын 1 күнүттэн ОДьКХ үлэһиттэрин хамнастара 12% үрдүүрүн, уолаттар билигин 25 тыһ. ылар эбит буоллахтарына, 28 тыһ. солк. ылыахтара диэн эттэ.

Салгыы Егор Борисов Р.И. Шадрин аатынан Саккырыыр орто оскуолатыгар сырытта. Ил Дархан үөрэх кыһатын музейын, төрөөбүт тыл уонна литература кабинетын көрдө, учууталлары уонна быйыл оскуоланы бүтэрэр үөрэнээччилэри кытта кэпсэттэ. Учууталлар улууска демографическай балаһыанньа үчүгэйин, сыллата үөрэнээччи ахсаана элбээн иһэрин, аны аҕыйах сылынан бу оскуолаҕа оҕолор батыа суохтарын, аны оскуола эргэрбитин, баһаарынай да өттүнэн ирдэбилгэ эппиэттээбэт буолбутун туһунан этэн туран, саҥа оскуола тутуутун туруорустулар. Бу кэннэ Ил Дархан быйыл оскуоланы бүтэрээри сылдьар үөрэнээччилэрдиин көрсөн истиө кэпсэтии таҕыста. Егор Борисов оҕолорго туһаайан: "Оскуоланы бүтэрдэххитинэ төрөөбүт дойдугутугар туһалаах үлэһит дьон буолан эргиллиэххит, олох дьалхааныгар оҕустарбакка сылдьыаххыт диэн эрэнэбин», - диэтэ. Кини аныгы үйэ иэдээнэ буолбут арыгылааһын тула бэйэтин санаатын үллэһиннэ: "Мин оҕо сылдьан арыгыны хаһан даҕаны иһиэм суоҕа диэн бэйэбэр тылбын биэрбитим, онон оччоттон баччаҕа диэри аһыы утаҕы амсайбаппын. Киһи олоҕор принциптээх буолуохтаах. Эдэргититтэн бэйэҕитигэр үчүгэй принциптэри ылынан, ону тутуһан сырыттаххытына инникитин хайдахтаах да балаһыанньаҕа өлөн-охтон биэриэххит суоҕа," - диэн сүбэлээтэ. Үөрэнээччилэр Егор Афанасьевичка ыйытыылары биэрдилэр уонна онно толору хоруйдары ыллылар.

Салгыы Егор Борисов салайааччылаах бөлөх улуустааҕы киин балыыһаҕа сырытта. Бастатан туран, Ил Дархан чааһынай аптеканы көрдө-иһиттэ, туох эмп-томп баарын туоһуласта. Ити кэннэ стационар балыыһаҕа киирэн "Земский доктор" бырагырааманан үлэлии кэлбит быраастары кытта кэпсэттэ, улуустааҕы киин балыыһаҕа туох кыһалҕа баарын, поликлиника тоҕо үлэлээбэтин ыйыталаста. Онуоха мустубут дьон поликлиника тутуутун хаачыстыбата куһаҕанын, муостата аһаҕаһын туһунан эттилэр. Егор Борисов тутуу бара турар кэмигэр хас биирдии улуус олохтооҕо хонтуруоллуон наадатын эттэ. "Тутааччылар эппиэтинэһэ суохтук сыһыаннаспыттарын түмүгэр маннык хартыына тахсар", - диэтэ. Доруобуйа харыстабылын миниистирэ Александр Горохов кыһыҥҥы суолунан поликлиника өрөмүөнүгэр матырыйаалы аҕалыахпыт диэн эттэ. Кустуур учаастактааҕы балыыһатын бырааһа Умсуура Софронова нэһилиэк балыыһата олус эргэрбитин туһунан эттэ. Егор Борисов билигин дойду үрдүнэн балаһыанньа уустугурбутун, бюджет харчыта кыччаабытын, онон бу нэһилиэк учаастактааҕы балыыһатыгар чугастааҕы сылларга өрөмүөн эрэ ыытыллыан сөбүн эттэ. Фтизиатр быраас Екатерина Герасимова сэллик ыарыытын быһаарарга рентгент аппарат наадатын туһунан эттэ. Салгыы Егор Борисов нарколог үлэтин-хамнаһын ыйыталаста уонна: "Арыгылааһын диэн ыарыы, ыарыыны эмтиэххэ наада. Аҥардас эмп-томп күүһүнэн эрэ буолбакка, эрдэттэн сэрэтии, сырдатыы үлэтэ ыытыллыахтаах. Уопсастыбаннас маннык дьонтон туора туруо суохтаах, киһилии сыһыаннаһыахтаах. Бэл билигин инбэлииттэри итэҕэс дьон курдук көрүү баар. Оннук буолуо суохтаах", - диэн эттэ.