Тэрээһиҥҥэ РФ бырабыыталыстыбатын бэрэссэдээтэлин солбуйааччы, РФ президенин Уһук Илиҥҥи федеральнай уокуругар боломуочуйалаах бэрэстэбиитэлэ Юрий Трутнев, Уһук Илиҥҥи региону сайыннарыы миниистирэ Александр Галушка, бу федеральнай уокурукка сыһыаннаах Госдума депутаттара, Федерация Сэбиэтин чилиэннэрэ кытыннылар.

Юрий Трутнев  кулун тутар бүтүүтэ инникилээн иһэр экономическай-социальнай сайдыы сирдэрин-уоттарын сүрүннүүр сокуон күүһүгэр киирэрин, онуоха диэри нуорма, быраап аакталарын бэлэмнээһин үлэтэ ыытылларын эттэ. «Уруттаан иһэр сайдыы сирин-уотун талар үлэ номнуо бара турар», – диэтэ кини. Маннык сайдар сирдэр ахсааннарыгар бастакы үс сир (икки Хабаровскайга, биир Приморьеҕа), алта инновационнай бырайыак, ол иһигэр Саха сиригэр Инаглинскайдааҕы комплексы уонна «Таежный» хайаны байытар кэмбинээти тутууну талбыттарын вице-премьер бэлиэтээтэ.

«Бырайыактарга барыларыгар инфраструктурнай эбийиэктэри тутаммыт көмөлөһүөхпүт», – диэтэ Трутнев. Бастакынан талыллыбыт сирдэргэ уонна инвестиционнай бырайыактарга государство бюджетыттан 23 млрд солк. бэриллиэҕэ. Чааһынай инвестордартан киирэр үп-харчы кээмэйэ 180 млрд солк. Сири-уоту сайыннарыы кэмигэр бу сыыппара эбиллэрэ күүтүллэр.

Аан дойду экономикатыгар буола турар быһыы-майгы Уһук Илиҥҥи уокуругу сайыннарыыга, атын бырайыактары таларга мэһэйдээбэтин РФ президенин боломуочуйалаах бэрэстэбиитэлэ эттэ.

Александр Галушка эппитинэн, инникилээн иһэр сайдыы сокуонун ситэриигэ этиилэр киирэллэр.

Инвестиционнай бырайыактар Уһук Илиҥҥи федеральнай уокуругу сайыннарыыга төһүү күүс буолаллар.«Нефтехимия, газохимия, маһы таҥастыыр, тыа хаһаайыстыбатын бородууксуйатын астыыр собуоттар тутуллуохтара, хайаны байытар кэмбинээттэр үлэлиэхтэрэ», – диэтэ миниистир.

Ону таһынан миниистир региоҥҥа федеральнай аадырыстаммыт инвестиционнай бырагыраама иитинэн оҥоһуллар үбүлээһин ситэритэ суоҕун эттэ. Ол курдук, атын регионнары кытта тэҥнээтэххэ, 2015 сылга манна доруобуйа харыстабылын үбүлээһин кээмэйэ Россиятааҕы орто таһымтан 3,5 төгүл кыра. Үөрэҕииигэ бэриллэр үп-харчы кээмэйэ 17,6 төгүл, культураҕа – 1,8 төгүл намыһах.

Саха Өрөспүүбүлүкэтэ аадырыстаммыт инвестиционнай бырагыраама чэрчитинэн бэриллэр үп-харчы тус сыалынан туһанылларын туһугар бюджет кодексыгар уларытыылары киллэрэргэ этиитин РФ Счетнай палаатата өйөөтө. Миниистир маны депутаттар болҕомтоҕо ылылларыгар уонна бу кыһалҕаны быһаарыыга ылсан үлэлииллэригэр ыҥырда.

Кризиһи утары миэрэлэргэ, чуолаан предпринимательствоны өйөөһүҥҥэ элбэх этии киирэрин, регионнарга салайар хамаандалар үлэлэриттэн элбэх тутулуктааҕын ойуччу тутан эттэ.

Вице-премьер Юрий Трутнев кулууп мунньаҕын кыбаартал ахсын ыытар уонна онно РФ бырабыыталыстыбатын атын чилиэннэрин кытыннарар наадалааҕын бэлиэтээтэ.