1914-1918 сылларга аан дойду бастакы сэриитин туһунан биһиги дойдубутугар кэлиҥҥи кэмҥэ диэри улаханнык саҥарар, дуорааннаахтык этиллэр бобуулаах этэ. Тоҕотун үгүспүт сэрэйэр. Бу сэрии империя суллуутун, былааска болшевиктар кэлиилэрин кытта ыкса ситимнээх. Ол да буоллар, бу сэриигэ биһиги биир дойдулаахтарбыт хорсуннук-хоодуоттук сэриилэспиттэрэ.

Дойду президенэ Владимир Путин атырдьах ыйын 1 күнүн аай дойду бастакы сэриитигэр өлбүт буойуннар күннэринэн биллэрбитэ. Былырыыҥҥыттан ыла бу күнү бэлиэтиир буолбуппут.  Быйыл атырдьах уонна балаҕан ыйдарыгар «империалистическэй» сэрии саҕалыммыта 100 сылын бэлиэтиибит.

Саха сирэ ити тэрээһинтэн эмиэ хаалсыбата. Егор Борисов  өрөспүүбүлүкэҕэ киэҥник биллэр фотокорреспондент  Владимир Доброхотовка бу сэрии ханна да суох хаартыскалара баалларын туһунан билбитэ. Аан дойду бастакы сэриитин ыар сылларын көрдөрөр 250 хаартыска негативтарын киниэхэ Владимир Доброхотов эһэтэ Константин Анатольевич биэрбит. Кини 46-с артиллерийскай полкаҕа байыаннай бырааһынан үлэлээбит эбит.

 Константин Доброхотов  хаалларбыт сүдү баайа халтайга хаалбатын туһугар Саха сирин баһылыгын эбээһинэһин быстах кэмҥэ толорооччу Егор Борисов ХИФУ салалтатын уонна «Сахамедиа» холдинг хаартыскалары чөлүгэр түһэрэллэригэр уонна аналлаах быыстапканы тэрийэллэригэр эппитэ. Икки ый буолан баран «У героев былых времен не осталось теперь имен…» быыстапка көрөөччүлэргэ аанын тэлэччи аста.

Быыстапканы үөрүүлээхтик аһыыга ХИФУ ректора Евгения Михайлова, «Сахамедиа»РИИХ генеральнай дириэктэрэ  Кирилл Алексеев, студеннар уонна коллекцияны харайааччы Владимир Доброхотов хас биирдии хаартысканы Егор Борисовка билиһиннэрдэ.

Егор Афанасьевич тыл ылла уонна Саха сирин дьиҥнээх историятын үөрэтиигэ, чинчийиигэ улахан үлэ ыытылларын туһунан эттэ. Кини аан дойду бастакы сэриитин уонна билиҥҥи кэми ыксары ситимнээтэ.

Егор Борисов эппитинэн, архыып даннайыгар олоҕурдахха, Саха сириттэн бу сэриигэ тыһыынча кэриҥэ киһи кыттыбыт. Саха дьоно сэриилэспиттэрин таһынан байыаннай наадыйыыга үп-харчы , ичигэс таҥас ыыппыттар эбит.

Историянан дьарыктанар студеннар, уһуйааччылар бу сэриигэ кыттыбыт дьон аатттарын чуолкайдыылларыгар эттэ.

Быыстапка Москваҕа тиийиэҕэ уонна үбүлүөйү ыытар тэрийэр бөлөххө (салайааччы Госдума спикерэ Сергей Нарышкин) бэриллиэхтээх.

Константин Анатольевич Доброхотов хаартыскаларын «Царское село» государственнай музей-заповедник эмиэ улаханнык интэриэһиргээбит.