«Якутия» авиакомпания үлэтигэр анаммыт мунньахха СӨ-гэр бырабыыталыстыба бэрэссэдээтэлэ  Галина Данчикова, РФ президенин уонна бырабыыталыстыбатын салалталарынан үлэлиир Саха сирин бастайааннай бэрэстэбиитэлэ Алексей Стручков, баай-дуол, сир сыһыаннаһыыларын миниистирэ  Евгения Григорьева, тырааныспар миниистирин солбуйааччы Ираида Гермогенова, «Республиканская инвестиционная компания» ААО салайааччыта  Петр Алексеев  уонна «Авиакомпания «Якутия» ААО генеральнай дириэктэрэ  Ольга Федорова кыттыыны ыллылар.

Олохтоох бизнес ситиһиитэ намтыы турар кэмигэр дойду элбэх авиакомпаниятыгар, ол иһигэр Саха сирин авиакомпаниятыгар судургута суох кэмнэр кэлэн тураллар.

«Якутия» авиакомпания көдьүүһэ суох ороскуотун аччатар туһугар кэккэ миэрэлэри ылар. Ол курдук, бу соторутааҕыта барыһа суох уонна ньочооттоох 22 рейси тохтоттулар. Салгын суднолара араас тииптээхтэрин туоратыы саҕаламмыта. Тоҕо диэтэххэ, бу суднолары көрүү-истии ороскуота кырата суох. «Якутия» сыыйа-баайа «Boeing 757-200» тииптээх суднолартан аккастаныаҕа.

Компания салайааччыта Ольга Федорова эппитинэн, лайнердар үлэлэрэ орто көрдөрүүгэ тиийбэт. Бүгүҥҥү туругунан сууккаҕа 8-9 чааһынан муҥурданаллар. Онтон ити нуорматтан намыһах. Ону тэҥэ ыстааты сарбыйыы үлэтэ сыыйа-баайа олоххо киирэр, ол иһигэр салайар, административнай аппараат үлэһиттэрин ахсаана аччатыллар.

Компания үп-харчы өттүнэн туруга тупсарыгар бас билээччи үбү-харчыны угуохтаах. Онуоха «РИК+» ААО сайдыы институтун өйүүргэ анаммыт үбүттэн-харчытыттан 1 млрд солк. «Якутия» салгын тырааныспарын компаниятыгар ыытар туһунан этии баар.

Өрөспүүбүлүкэ бюджета социальнай хайысхалаах, онон государство көдьүүстээхтик үлэлиир бас билээччи буолар кыаҕа суоҕун туһунан Саха сирин баһылыга Егор Борисов эрдэ да этэрэ, билигин да ону хатылаата. Өрөспүүбүлүкэ олоҕор-дьаһаҕар тутаах суолталаах бөдөҥ компаниялары государство бас билээччи быһыытынан көрүөхтээх-истиэхтээх. Оттон оннук бөдөн тэрилтэлэрэ аҕыйахтар: «ЛОРП» ААО, «ЖКХ РС(Я)» ГУП, «Сахатранснефтегаз» ААО, «Якутский хлебокомбинат» ААО…

«Якутия» авиакомпания, биллэн турар, өрөспүүбүлүкэҕэ, Уһук Илиҥҥэ ылар оруола кырата суох. Онон, Егор Борисов сөбүлэһиитинэн, өрөспүүбүлүкэ бырабыыталыстыбата компанияны өйүөҕэ.

«Бырабыыталыстыбаны уонна миигин кэккэ компаниялары государство бас билиитигэр хаалларбатылар диэн дьон-сэргэ үгүстүк сэмэлиир. Приватизацияламмыт тэрилтэ государство бас билиитигэр сылдьааччыттан таһыччы сайдар түгэнэ элбэх. Государство бас билиитигэр бааллар хаалыылаах буолаллара уонна сотору-сотору үп-харчы көрдүүллэрэ үгүс. Билигин эмиэ үбү-харчыны барыырбытыгар тиийэбит», -диэтэ Егор Афанасьевич.

Государство көмөтүгэр тирэҕирэн «Якутия» авиакомпния үп-харчы өттүнэн туругун биллэ тупсарыаҕа уонна дойду бүтүннүүтүн экономикатыгар үөскээбит уустук кэми туоруоҕа.

Компания сотору кэминэн стратегическай инвесторы булан, Азия соҕуруулуу-илиҥҥи өттүгэр бастыҥнар ахсааннарыгар киирэр толору кыахтаах. Ити туһунан egorborisov.ru. саайтыгар суруллар.