Ытыктабыллаах Сунтаар улууһун олохтоохторо!

2014 сыл балаҕан ыйын 14 күнүгэр республика үрдүнэн республикабыт баһылыгын, Ил Дарханы талаары быыбарга бэлэмнэнэ сылдьабыт. Сокуон саҥа нуорматынан, билигин Аҕа баһылыкпытын быыбардааччлар куоластаан талар буоллубут. Биһиги Сунтаар улууһун нэһилиэктэрин баһылыктара, оройуон, нэһилиэк Сэбиэтин депутаттара, буолаары турар быыбарга “Биир ньыгыл Россия”  политическай партия Саха сиринээҕи салаата быстах кэмҥэ Ил Дархан эбээһинэһин толорооччу Егор Афанасьевич Борисов кандидатуратын өйүүрбүтун биллэрэбит уонна бары быыбардааччылары, Саха сирин олохтоохторун киниэхэ куоластыыргытыгар ыҥырабыт.

Егор Афанасьевич Саха сирин республикатын лидерэ, практик-салайааччы, салайар үлэҕэ улахан опыттаах, сахалыы өйдөөх-санаалаах тэрийээччи буолар. Президенинэн талыллан баран, инники үлэлээбит Президеннэрбит ыыппыт үлэлэрин, политикаларан салгыы сайыннаран иһэр, республикабыт Российскай Федерация бастыҥ регионнарыттан хаалсыбакка үлэлээн-хамсаан иһэрин бэлиэтиибит, көрө-истэ сылдьабыт.

Президеммит тыа сирин сайдыытыгар улахан болҕомтотун ууран туран үлэлээбитэ үтүө түмүктэрдээх. 2013 сыл тыа сирин сылынан биллэрэн туран, хас биирдии нэһилиэк ахсын 1 мөл. солкуобайы нэһилиэктэри тупсарыыга, чэбдигирдиигэ, суол-иис оҥоһуутугар үп-харчы көрүллүбүтэ. Бу үлэлэр ыытыллыбыттара киһи хараҕар быраҕыллаллар. Оттон быйыл нэһилиэктэргэ, нэһилиэктэриттэн көрөн  1-2 мөл. солкуобай көрүлүннэ, бу улахан туһалаах көмө буолар.

Республикаҕа ыытыллар үтүө уларыйыылар – бу саҕалааһын быһыытынан көрөбүт. Егор Афанасьевич республика олохтоохторун олоҕун тупсарарыгар киэҥ ис хоһоонноох программалардаах. Тыа сирин сайдыытын, суол-иис, тутуу, энергетика, инфраструктура, култуура, медицина, хаарбах дьиэлэр боппуруостарыгар быһаарар былааннаах.

Егор Афанасьевич тыа нэһилиэктэрин кытта быһаччы үлэлиир. Сорох эдэр быһылыктары кытта күннэтэ быһаарса, көмөлөһө олорор.

Егор Афанасьевич Бүтүн Россияҕа ытыктанар, улахан аптарытыаттаах салайааччы буоларын билэбит. Эппитин толорор, үрдүк таһымҥа санаатын ылыннарар, эрэннэрбитин ситиһэр тумус туттар киһибит буолар.

Ытыктабыллаах Сунтаар улууһун олохтоохторо!

Ыам ыйын 28 күнүгэр ыытыллаары турар праймеризкэ уонна балаҕан ыйын 14 күнүгэр республика баһылыган талар быыбарга бары биир санааннан Егор Афанасьевич иһин куоластыыргытыгар ыҥырабыт!