Регистрацияҕа ирдэниллэр маннык докумуоннары атырдьах ыйын 1 күнүгэр диэри ылаллар. РФ Федеральнай Мунньаҕын Федерация Сэбиэтигэр чилиэннэрэ буолар кыахтаах дьон испииһэгэ уонна муниципальнай баһылыктар, депутаттар өйүүллэрин биллэрэн илии баттааһыннара — бу сүрүн докумуоннар.  Егор Борисов  быыбарга кыайдаҕына, Россия парламенын үрдүкү палаататыгар Саха сирин бэрэстэбиитэлинэн  Александр Дудников, эбэтэр  Ольга Федорова, эбэтэр  Вячеслав Штыров буолуоҕа. Егор Борисовы өйүүр баһылыктар уонна депутаттар, барыта 285 киһи илии баттаабыт. Илии баттааһыннары Егор Борисов бүгүн от ыйын 29 күнүгэр Быыбар киин хамыыһыйатыгар туттарда.

Саха сирин баһылыгын эбээһинэһин быстах кэмҥэ толорооччу кинини өйөөбүт дьоҥҥо улаханнык махтанна уонна быыбар иннинээҕи аҕытаассыйаҕа кыттыбатын туһунан эттэ. «Миигин өйүүр хамаанда, штаб быыбар сокуонунан салайтаран дьону кытта үлэлиэхтэрэ. Бастаан утаа аҕытаассыйа тэрээһиннэригэр кыттарым дуу дии санаабытым. Ол эрээри, өрөспүүбүлүкэҕэ быһыы-майгы уустук: баһаар, халаан, кураан, навигация, о.д.а. кыһалҕа үгүс. Онон, суһал быһаарылары ылар туһугар үлэлиир миэстэбэр баар буолуохтаахпын. Дьону айылҕа иэдээнин кэмигэр булгуччу өйүөххэ наада. Уоппускаҕа барбаппын, быһыыны-майгыны кыраҕытык хонтуруоллуом», - диэтэ Е.Борисов.

Егор Борисов быыбар ыраастык уонна чиэһинэйдик барыахтааҕар, административнай ресурса туһаныллыа суохтааҕар болҕомтону тарта. «Бэйэм хамаандабар, дьаһалта, бырабыытыластыба үлэһиттэрэ, баһылыктар быыбар хаамыытыгар дьайбаттарыгар сорудахтаатым. Быыбар ыраас буолуохтаах, араас технология туттуллуо суохтаах. Дьону тылга киллэриэххэ, итэҕэтиэххэ уонна дакаастыахха наада диэн санаанан салайтарабын», - диэтэ кини.