Дьиҥнээх чинчийии ахсынньы уонна 2013 сыл бүтүннүүтүн түмүктэринэн ыытылынна. Экспертэр бөлөхтөрүгэр Виктор Ермаков (Россия кыра уонна орто бизнеһын өйөөһүн агентствота), Николай Вардуль («Финансовая газета», «Новая газета»); Валерий Хомяков (Национальнай стратегия Сэбиэтэ), Игорь Харичев (Талар прикладной технология Киинэ), Михаил Сергеев («Независимая газета»), Алексей Зудин (Россия политическай конъюнктуратын Киинэ), Марк Урнов («Экспертиза» ырытар программалар фондалара), Юрий Бондаренко («Возвращение» фонд), Александр Тутушкин (ырытааччы), Сергей Туранов (Экономическэй сонуннар Агентстволара), Шод Муладжанов («Московская правда»), Юрий Якутин («Экономика и жизнь») уонна да атыттар бааллар.

Амур уобалаһын губернатора Олег Кожемяко рейтинэ үрдээһинэ, арааһа кини туруулаһар Благовещенскайдааҕы Зея өрүһү уҥуордуур курбэни тутуу бырайыага Дальнай Восток сайдыытын федеральнай программатыгар киллэриллибититтэн буолуон сөп.

Бу номинацияҕа Тува баһылыгын Шолбан Кара-оол балаһыанньата үчүгэй. Кини премьер-министр Дмитрий Медведев правительствоҕа республика социальнай-экономическэй сайдыытын кэлим программатын оҥорорго соруйбутун ситиспитин иһин үрдүккэ таҕыста дииллэр.

Монополияны утары федеральнай сулууспа баһылыга Игорь Артемьев рейтинэ түстэ.

Ону тэҥэ «Россия тимир суоллара» хампаанньа салайааччыта Владимир Якунин «ыйааһына» аччаата. Президент Владимир Путин Госсэбиэт мунньаҕар нефть уонна нефть бородуукталарын тиэйиигэ тарибы үрдэтиигэ этиитин өйөөбөтөҕө.

«Бастакы сирэйдэр» номинация лидердэрин кэккэлэригэр уларыйыылар таҕыстылар. Иккистэн бастакы миэстэҕэ президент администрациятын салайааччыта Сергей Иванов, урукку кыайыылааҕы – бастакы вице-премьеры Игорь Шуваловы сабырыйда. «Роснефть» баһылыга Игорь Сечин үһүскэ тахсан, аан бастаан «бириистээх үскэ» киирдэ.

Регионнааҕы номинацияҕа Москва мэрэ Сергей Собянин ааспыт сыл устатыгар иннини кимэхэ да биэрбэтэҕэ. Иккис уонна үһүс миэстэлэргэ Чечня уонна Татарстан баһылыктара Рамзан Кадыров уонна Рустам Минниханов сылдьаллар.

Саха Республикатын Президенэ Егор Борисов бу дьоһуннаах рейтиҥҥэ "Сильная эффективность" кэрдиискэ киирдэ. Кини дойду үрдүнэн 16 миэстэҕэ уонна Дальнай Восток федеральнай уокуругун баһылыктарын ортолоругар 1 миэстэҕэ таҕыста. 20 бастыҥнар истэригэр ону тэҥинэн Амур уобалаһын, Хабаровскай уонна Приморскай кыраайдар губернатордара киирдилэр.