Киһи аймах историятыгар хаһан да буолбатах ынырык сэриигэ элбэх киһи кыа хаана тохтубута, уонунан мөлүйүөн киһи суорума суолламмыта. Биһиги Сахабыт сирин 62 тыһыынча эдэр уолаттара уонна кыргыттара уоттаах сэриигэ туруммуттара. Онтон 40 тыһыынчата сэрии толоонуттан эргиллибэтэҕэ. Саха буойуннара Аҕа дойду улуу сэриитин саамай кырыктаах, уонна бөдөҥ кыргыһыыларыгар Москва, Ленинград, Сталинград куораттарга, Кавказка, Курскай дугаҕа, Украинаҕа, Белоруссияҕа, Европа дойдуларын, Японияны милитаристарыттан көмүскээһиҥҥэ хорсуннук сэриилэспиттэрэ.

Сэрии кэмигэр тыылга дьон түүннэри-күнүстэри үлэлиирэ. Кинилэр хамнастарыгар тааҥка икки колонната, бомбардировщиктар, санитарнай авиация о.д.а. оҥоһуллубута. Оборона фондатыгар республика 38 мөл.солк. харчыны, 90 мөл. суумалаах түүлээҕи, 553 кг күндү металлы, сүһүнэн тыһыынча ичигэс таҥаһы, о.д.а. көмө быһыытынан биэрбитэ.

Бүгүн ытыктабылы, умнубаты эрэ биллэрэр күн диир кэрэгэй. Биһиги төрөөбүт дойдубут чэчирии сайдарын, сырдык инникилээх буоларын туһугар тугу гыныахпытын сөбүн туһунан элбэҕи уонна киэҥи толкуйдуубут. Саха сирэ экономическай көрдөрүүтүнэн бүгүн инники күөҥҥэ сылдьар. Аҕа дойду Улуу сэриитин кыттыылаахтара итиниэхэ сүдү өҥөлөөхтөр. Тоҕо диэтэххэ, сэрии кэннинээҕи сылларга дойду саҥа экономикатын олуга ууруллубута. Биһиги олохпут бигэ уонна үөрүүлээх буоларыгар кыаллары барытын оҥоруу — биһиги ытык эбээһиннэспит.

Күндү бэтэрээннэр!

Эйэлээх, иллээх олоҕу эргитэр туһугар эһиги хорсун быһыыгыт иһин сүгүрүйэбит. Биир санаанан салайтаран ханнык баҕарар ыараханы туоруур үтүө холобуру эһиги көрдөрбүккүт. Хомойуох иһин, Кыайыыны аҕалбыт көлүөнэ дьоно сыл, хонук аастаҕын аайы аҕыйаан иһэллэр. Ол да буоллар, Кыайыы 70 сыллаах үбүлүөйүн биэтэгэр чугаһаатыбыт.

Кытаанах доруобуйаны, уһун дьоллоох олоҕу, эйэни баҕарабын! Өрөгөйдөөх Улуу Кыайыы күнүнэн!

Саха Республикатын баһылыгын э.т. Е. БОРИСОВ