Андрей Панов этэринэн, Саха сирин бырабыыталыстыбата олохтоох дьону промышленноска үлэлэтэргэ кыаллары барытын оҥорор. Холобур,  «ЕВРАЗ», «Сургутнефтегаз» тэрилтэлэри кытта бииргэ үлэлээһин туһунан түһэрсибит дуогабарыгар олохтоох дьону үлэнэн хааччыйыы туспа пуунунан киирэ сылдьар. Алмааһы, көмүһү хостуур, маһы таҥастыыр салааларга биир үксүн олохтоох дьон үлэлииллэр. Нефть-газ промышленноһыгар олохтоох нэһилиэнньэ суоҕун кэриэтэ.

«Нефть, газ өрөспүүбүлүкэҕэ соторутааҕыта кэлбитэ. Кэмигэр каадыры бэлэмнии охсубатахпыт. Үөрэх кыһаларын үөрэтэр, материальнай-техническэй базалара хайаатар да саҥардыллыахтаахтар. Өрөспүүбүлүкэ Россия киин сириттэн ырааҕа үөрэтиигэ кэккэ ыарахаттары үөскэтэр», - диир миниистир.

Өрөспүүбүлүкэҕэ баар компанияларга үрдүк квалификациялаах специалист элбэҕэ суох. Ааспыт сылга олохтоохтортон 320 киһи үлэнэн хааччыллыбытын туһунан миниистир  Панов бэлиэтиир. Кини эппитинэн, «Сибиир күүһэ» газопроводы тутуу үлэтигэр кыттыан сөптөөх тутуу, таһаҕаһы тиэйии тэрилтэлэрин испииһэгэ оҥоһуллубут. «Олохтоох дьону үлэнэн хааччыйыыны инники күөҥҥэ тутабыт, онуоха кыаллары барытын оҥоробут», - диэтэ Андрей Панов.