Газохимическэй собуот карбамиды, метанолы уонна убатыллбыт айылҕа гааһын оҥорон таһаарыахтаах. Россия вице-премьера Юрий Трутнев атын регионнардааҕар Саха сирин Аллараа Бэстээҕэр собуоту тутуу  ордук табыгастааҕын бэлиэтээбитэ.

 «Заречье» («Илин Эҥэр») уруттаан сайдыы сиригэр-уотугар интэриэстээх инвестордар бааллар. «РТ-Глобальные ресурсы» уонна Global Steel Holdings, Ltd (Индия) карбамиды оҥорор былааннаахтар, «ЯТЭК» ААО метанолу уонна убатыллыбыт айылҕа гааһын оҥорон таһаарар соруктаах. Инникилээн сайдыы сирэ-уота 2,92 тыһ. га сири хабар, «Лена» массыына суолуттан 2 км, Аллараа Бэстээх тимир суолун станциятыттан 8,6 км, “Павловскай-Майа” газ магистральнай утаҕыттан 1 км тэйиччи буолуоҕа.

Эбийиэк сыаната - 158 млрд солк., 11 млрд солк. инфраструктураны сайыннарыыга туттуллуоҕа.

Саха сирин промышленноһын миниистирэ Андрей Панов уопсастыбаннай ырытыыга эппитинэн, бырайыак техническэй докумуона билиҥҥитэ оҥоһулла илик. «Заречье» («Илин Эҥэр»)  бырайыак барыллаан ааҕыылара эрэ бааллар.

«Докумуон икки бүк экспертизаны булгуччу ааһыаҕа. Идэлээхтэр, тутулуга суох экспертэр маны ымпыгар-чымпыгар тиийэ ырытыахтара. Ону таһынан дьон-сэргэ санаата болҕомто киинигэр туруоҕа. Бырайыагы көҕүлээччилэр Саха сирин олохтоохторугар собуоту тутууга туох-ханнык матырыйаал, оборудование туттулларын, эбийиэккэ төһө киһи үлэлиэҕин, бырайыак олоххо киириитэ өрөспүүбүлүкэҕэ туох туһаны аҕалыаҕын туһунан кэпсиэхтэрэ», - диэтэ Панов.

Инфраструктура РФ бюджетын суотугар тутуллуоҕа. Миниистир эппитинэн, киирбит үп сороҕун бырабыыталыстыба «Орто Бүлүүтээҕи газоконденсатнай баайдаах сир – Мастаах-Бөргө-Дьокуускай» үһүс утаҕы оҥорууга туттуоҕа.  Бу 84 км уһуннаах учаастагы тутууга өрөспүүбүлүкэ үбү хаһыс да сылын туруорсар.

Промышленность миниистирэ этэринэн, Аллараа Бэстээххэ собуот тутуллуута - өрөспүүбүлүкэҕэ гаас тиһигэ сайдарыгар улахан төһүү.

Андрей Панов 1500 үлэ миэстэтэ тахсыаҕын бэлиэтээтэ. Саҥа собуоту тутуу хоту сирдэргэ уматыгы тиэйии кыһалҕатын быһаарыаҕын туһунан миниистир эттэ.

Итини таһынан кини экологическай боппуруоһу сытыытык туруорда.

«Собуот тулалыыр эйгэҕэ дьайыыта техническэй документацияҕа киириэҕэ. Туруоруллар тэриллэри, көрдөрүүлэри ырытыахпыт. Бырабыыталыстыбаҕа сыһыаннаах да, сыһыана да суох экспертэр сыаналааһыннарыгар ураты болҕомтону ууруохпут. Үрдүк технологиялаах оҥорон таһаарыыга Саха сирэ муҥутуурдук наадыйар. Ол эрээри, ити дьоҥҥо, тулалыыр эйгэҕэ хоромньуну оҥоруо суохтаах. Бырабыыталыстыба экономическай барыс оннугар эбийиэк дьон доруобуйатыгар, айылҕаҕа буортута суох буолуутун туохтааҕар да өрө тутар», - диэтэ кини.