Смартфон олоххо киириэҕиттэн ыла оҕолор Интернети кэбэҕэстик туттар буоллулар. Интернет-технологиялар оҕолорго тутулуктаныыны үөскэтэрин сорох төрөппүттэр аахайбакка да хаалаллар. Ити туһунан төгүрүк сотуол кыттыылаахтара эттилэр.

Юстиция государственнай кэмитиэтин салайааччыта, «Россия Ийэлэрэ» бүтүн Россиятааҕы уопсастыбаннай хамсааһын Саха сиринээҕи салаатын чилиэнэ Сардана Гурьева маныаха төрөппүт оруола, эппиэтинэһэ улаханын бэлиэтээтэ.

Төрөппүттэр ааттарыттан оҕо быраабыгар боломуочуйалаах апараатын ыстаарсай референэ  Ньургуяна Иванова государство дуу, провайдер дуу туох быһаарыыны ылынарын кэтэспэккэ, бэйэ ылсара ордук наадалааҕын ыйда. «Социальнай тиһиктэргэ бэрээдэктээх буоларга, төрөппүттэри кытта иитии туһунан кэпсэтэри наадалааҕынан ааҕабын», - диэтэ кини.

«Россия Ийэлэрэ» бүтүн Россиятааҕы уопсастыбаннай хамсааһын Саха сиринээҕи салаатын бэрэссэдээтэлэ  Прасковья Борисова оҕоҕо Интернет кутталы үөскэппэтигэр ыкса үлэлиир оробуочай бөлөҕү тэрийэр наадалааҕын ыйда.

Мунньах бүтүүтэ миниистир Афанасий Владимиров  хамсааһыҥҥа уопсастыбаннай тэрилтэлэр кыттыһаллара ураты суолталааҕын бэлиэтээтэ. «Норуот педагогигатын ассоциацията төрөппүттэр культураларын үрдэтиигэ көдьүүстээхтик үлэлиэхтээх», - диэтэ кини.

Мунньах кэнниттэн Государственнай Мунньахха (Ил Түмэҥҥэ), үөрэх, ыччат, дьиэ кэргэн министиэристибэлэригэр, муниципальнай тэриллиилэргэ туһаайан чопчу туруорсуулары, этиилэри быһаардылар.