"Биһиги Виктордыын бииргэ дьарыктанабыт, сбордарга бииргэ сылдьабыт, кини мин доҕорум. Турнирга хапсыһыы кэмигэр кини да, мин да кыайарга дьулуһан тахсыбыппыт. Кини үчүгэйдик тустубута, тоҕо диэтэххэ - уһулуччулаах тустуук. Биһиги кинилиин өссө да официальнай күрэхтэһиилэргэ көрсүөхпүт. Виктор Лебедев турниргамиэхэ суолу солоон биэрдэ диэн боппуруостарга хоруйдаатахха, миигиттэн итини ыйытымаҥ", - диэн спортсмен, спортивнай форумнарга араас ырытыылар тустарынан ыйытыыларга хоруйдаан.

Санатан эттэххэ, Иван Ярыгин турнирын бастакы күнүгэр, 57 киилэҕэ үһүс эргииргэ Владимир Флегонтов Виктор Лебедевы кыайбыта. Сол күн интернет-форумнарга тустууна таптааччылар эдэр спортсмены наһаа хабырдык киирсибитин иһин элбэхтэ сэмэлээбиттэрэ.

Владимир Флегонтовы пресс-конференция кэмигэр республика көҥүл тустууга федерациятын вице-президенэ Павел Пинигин көмүскэстэ. Кини ким да кимиэхэ да "суолу солооботоҕо" - икки Саха сирин тустууктара үһүс эргииргэ эрэ көрсүбүттэрэ, онно инникитин өссө элбэх кэрдиистэр бааллар этэ диэн быһаарда.

"Оттон Виктор Лебедев туһунан этэр буоллахха, кини,мин санаабар, саҥа быраабылаҕа өссө ситэ үөрэнэ илик, оттон эдэрдэр Флегонтов уонна Николай Ноев итиннэ киирдилэр. Биһиги икки төгүллээх чемпиоммут итини баһылаатаҕына, үрдүк түмүктэр кэлиэхтэрэ", - диэн бэлиэтээтэ Павел Пинигин.