Бүгүн республикаҕа 9 айар сойуустар бааллар, 9 идэтийбит уонна 49 народнай театрдар үлэлииллэр. А. Николаев өскөтүн бары айар тэрилтэлэр күүстэрин түмтэхтэринэ, культура Сыла үрдүк тэрээһиннээхтик ыытыллыаҕа диэтэ. "Биһиги сойууспут элбэх народнай театрдары кытта сибээһи тутуһар,биһиги бэ эбит коллегаларбытыгар көрүүлэри, фестиваллары ыытарга көхтөөхтүк көмөлөһөбүт, Саха театрын артыыстара оройуоннарга дьүүллүүр сүбэ чилиэннэринэн кытталлар, көрсүһүүлэри, маастар-кылаастары ыыталлар. Народнай театрдары биһиги репертуарынан, аппаратуранан, оборудованиенан өйүүбүт.

Быйыл Саха театра "культурнай пирамида" хас да хайысхатынан, ол иһигэр "Культура эйгэтигэр" кыттар. Биэс айар сойуус күүстэринэн - театральнай деятеллэр, кинематографистар, художниктар, суруйааччылар уонна ырыа айааччылар Сойуустара кыттыһан үлэ былаанын оҥордулар.

Итини таһынан Анатолий Павлович коллегаларыгар республика театральнай деятеллэриттэн биирдэстэрин, Нерюнгритааҕы Актер уонна Куукула Театрын уус-уран салайааччытын, Саха сирин искусствотын үтүөлээх деятелин Петр Скрябины билиһиннэрдэ. Арктика Сылынан сибээстээн Саха театрын директора культура управлениетын начальниктарыгар театры өйүүллэригэр уонна бэйэлэригэр гастролларга ыҥыралларыгар көрдөстө. Ити кэнниттэн тута Эдьигээн, Анаабыр уо.д.а. улуустартан ыҥырыылар киирдилэр. Анатолий Николаев этиитин бүтүүтүгэр коллегаларыгар культура уонна Арктика сылларын ситиһиилээхтик ыыталларыгар баҕарда, диэн культура уонна духуобунай сайдыы Министерствотын пресс-киинэ иһитиннэрэр.