СТБ олунньу 3 күнүгэр киэһэ 23.30 буолла. Мэҥэ-Хаҥалас оройуонун ИДЬ салаатын дьуһуурунай чааһыгар «Лена» федеральнай массыына суолугар улахан саахал тахсыбытын туһунан биллэрии киирбитэ. Иһитиннэрии кэнниттэн тута быһылаан буолбут сиригэр ГИБДД инспектордара, суһал көмө эмчиттэрэ кэлбиттэрэ.

«Быһаарыллыбытынан, Аллараа Бэстээхтэн 2 километрдаах суолга 45 саастаах «Санг Йонг Истана» микроавтобус суоппара  биир хайысханан айаннаан испит «МАЗ» таһаҕас тиэйэр массыынаны кытта харсыбыт. Суол-транспорт быһылаанын түмүгэр микроавтобус суоппара уонна икки пассажир – 62 уонна 27 саастаах дьахталлар өлөрдүү эчэйбиттэр. «Истана» өссө алта пассажирдара  араас кээмэйдээх эчэйиини ылан, балыыһаҕа киирдилэр, биэс киһи– кыратык эчэйдилэр. Таһаҕас массыынатын суоппара туох да буолбатах», -  диэн кэпсээтэ Платонов.

Барыллаан дааннайынан, СТБ төрүөтүнэн хойуу туман кэмигэр массыына икки ардын уонна  сырыы тэтимин тутуспатахтан буолбут. Пассажирдар кэпсээбиттэринэн, кинилэр Павловскайтан  Төҥүлүгэ айаннаан испиттэр.
Бэрэбиэркэ ыытыллар.