«Суол картата» диэн тэрээһин чэрчитинэн РФ Правительствота гааһы тарҕатар ситимнэргэ холбонуу саҥа технологическай быраабылатын үөскэппитэ уонна бигэргэппитэ.

Уларытыы сүрүн ис хоһооно холбонуу бэрээдэгин чэпчэтиигэ, түргэтэтиигэ ананар. Манна гражданнар уонна предпринимателлэр төһө гааһы ороскуоттууллара аахсыллар.

Техническэй холбонууга урукку өттүгэр ыарахаттар чахчы бааллара. Докумуону толоруу болдьоҕо уһуна, сыаната ыарахана газка холбонууну улаханнык атахтыыра. Ити түмүгэр дьон сылы сыллаан күүтэргэ күһэллэллэрэ, сыана 100 тыһ.солкуобайтан 700-кэ диэри халбаҥныыра.

Саҥа быраабыла быһыытынан газка холбонуу биир сылы, сыаната 50 тыһ. солк. аһарыа, онтон тахсыа суохтаах.

Сир учаастагар газ ситимин тардыынан гааһы тарҕатар тэрилтэ дьарыктаныахтаах.

«Газка холбонуу процедурата хаһааҥҥытааҕар да судургу буолуоҕа. Туһанааччылар бэдэрээччиттэри көрдүүллэрэ, сыанатын туһунан дуогабардаһаллара, докумуону эккирэтиигэ элбэх күнү-дьылы барыыллара. Ити үлэни барытын аны биһиги тэрилтэбит оҥоруоҕа», - диэн «Саханефтегаз» гааһы тарҕатар управлениетыттан СИА-ҕа иһитиннэрдилэр.  

«Мантан ыла газка холбонуу сыанатын судаарыстыба сүрүннүөҕэ. Физическэй сирэйдэртэн уонна индивидуальнай предпринимателлэртэн чааска 5-тэн 15-кэ диэри кубометр гааһы ороскуоттааһын сыаната 50 тыһ.солк. куоһарыа суохтаах диэн ирдэбил турар», - диэн иһитиннэриигэ бэлиэтэнэр.

РФ Правительствотын бу дьаһалын олоххо киллэриигэ регионнар былаастара кэккэ усулуобуйалары толоруохтаахтар. Оннук, промышленность министиэристибэтэ «СР нэһилиэнньэлээх пууннарыгар газификация бырагырааматыгар» уларытыылары киллэриэхтээх. Ити уларытыы «Холбонуу иһин төлөбүр» чааһыгар киириэхтээх. Ону таһынан Дьокуускай дьаһалтатыгар газификация инвестиционнай былаана бигэргэниэхтээх. Манна 2014 сылга холбооһун суотугар киирэр газ ситимин схемата, эбийиэктэрэ ыйыллыахтаахтар. Сыана политикатын судаарыстыбаннай кэмитиэтигэр газ ситимигэр быһыллыбыт ыстаапка чопчу суруллар. Газтааһын инвестиционнай былааныгар киирсибэт аадырыстаах гражданнар уонна предпринимателлэр ити ыстаапканан туһанар кыахтаахтар.