"Бу — ханна да атыллыыта суох, хатылламмат, ураты таһаарыы. Бу — уран тарбахтаах уруһуйдьуттар илиилэрин иһиттэн тахсыбыт искусство айымньыта. Манна Удмуртия, Чуваш, Эвенк, Нуучча, Дагестан, Калмык, Татар, Саха норуоттарын уһулуччулаах айымньылара таҥыллан киирдилэр", - диэн кинигэни бэчээттээн таһаарар кыһаттан иһитиннэрэллэр.

Таһаарыы омуктар культурнай, духовнай сибээстэрин бөҕөргөтүүгэ сүрүн тирэх. Кинигэ ураты оҥоһуулаах, лааҕынан, кылабачыгаһынан тилэри киэргэтиллибит. Уус-уран оҥоһук улахан дьон эрэ буолбакка, оҕолор болҕомтолорун ылыан ылар, тардыан тардар.

"Надежда Андросова эрэдээксийэтинэн тахсыбыт "Любимые сказки народов России" хомуурунньук тыһыынча экземпярынан кулун тутарга тахсыбыта. Кинигэ "Книги России - 2014" 17-с бүтүн Россиятааҕы быыстапка-дьаарбаҥкаҕа сүрэхтэммитэ уонна бэчээт эйгэтин үлэһиттэрин үрдүк сыанабылын ылбыта. Билигин кинигэ Россия маҕаһыыннарыгар атыыга таҕыста", - диэн СИА-ҕа "Бичиктэн" эттилэр.