Дьарыгы Россия худуоһунньуктарын сойууһун чилиэнэ, колледж уһуйааччыта  Айталина Маркова тэрийэр. «Маннык ааптарскай куукулалары оҥоруу мин урут-уруккуттан сөбүлүүр дьарыгым. Оҥоруу техникатын аҕыйах сыллааҕыта баһылаабытым. «Грани мастерства» регионнар икки ардыларынааҕы куонкуруска куукулаларбын туруорбутум. Ити кэнниттэн технология уонна дизайн колледжа куруһуок ыытарбар этии киллэрбитэ», - диир Айталина Маркова. 

Кини ыытар куруһуогар барыта 6 кыыс дьарыктанар. Куукуланы оҥоруу сатабылын кыргыттар тилэри баһылаабыттар. Куукула уобараһын бэйэлэрэ толкуйдууллар.

Оҕолорго киэҥник тарҕаммыт Барби, Монстер Хай куукулаларга кыргыттар тоҥ сыһыаннаахтар. Саха куукулата маҕаһыыннарга атыыланыан баҕараллар. Талааннаах кыргыттарга куукуланы оҥорууга сакаас киирэр эрээри, үгстэри сыаната ыарахана чаҕытар. Биир куукула сыаната 5000 солк. саҕаланар. Хас биирдиилэригэр бу куукула хатыламматын, суос-соҕотоҕун, матырыйаалы ыраахтан сакаастаан ылалларын быһаарарга тиийэллэр.

«Хас биирдии кыыс оҕо ыра санаатын куукулатын оҥорор баҕалаах. Айталина Иннокентьевна салайыытынан, ыйыытынан-кэрдиитинэн искусство айымньыта оҥоһуллан тахсар. Бу олус умсугутуулаах, киһини курдаттыы тардар дьарык. Бастаан утаа куукула эскииһэ ымпыктаан-чымпыктаан толкуйданар. Полимернай туойунан куукуланы оҥороллор. Кыргыттар кэпсииллэринэн, саамай интэриэһинэйэ -куукула сирэйин оҥоруу, оттон саамай уустуга - илиитин уонна таҥыһын-сабын оҥоруу эбит. Чугас дьоммутугар көрдөрбүппүтүгэр биһиги оҥорбуппутун ким да итэҕэйбэтэҕэ, бары олус соһуйбуттара», — диэн кэпсииллэр 1 куурус струденнара Анна Колесова, Долгуйаана Данилова.