«Планетаҕа баар тыл арааһа – кини баайа. Ол эрээри хас икки нэдиэлэ буола-буола биир тыл сүтэр. Саха тылыгар сүтэр куттал суоһаабат, ол эрээри булгуччулаах дьаһаллары ылынар мэһэйдээбэт. Ханнык баҕарар тыл курдук, саха тыла аныгы усулуобуйаларга сөп түбэһиэхтээх. Ити классиканы уонна аныгы айымньылары үрдүк таһымнаахтык тылбаастааһыҥҥа сыһыаннаах. Атыннык эттэххэ, ити үлэ кэҥиэхтээх эрэ буолбакка, дириҥиэхтээх. Уонна, биллэн турар, ити бачыымы ыччат өйүөхтээх. Онно көлүөнэлэр ситимнэрэ бөҕөргүөхтээх», -диэн кэпсиир гуманитарнай-социальнай дисциплиналар салааларын сэбиэдиссэйэТатьяна Устинова.

Декада чэрчитинэн колледж студеннара биллиилээх олоҥхону ырытааччы, саха фольклорун тарҕатааччы, филологическай наука доктора Василий Илларионовтыын көрүстүлэр. Кини сыратынан саха олоҥхото ЮНЕСКО шедеврынан ааттаммыта.

Василий Васильевич оҕолорго элбэх интэриэһинэйи кэпсээтэ – оҕо сааһын, дьиэ кэргэнин, научнай үлэтин туһунан. Түмүгэр чэгиэн олоҕу тутуһалларыгар ыҥырда – ханнык баҕарар соругу доруобуйа баар буоллаҕына эрэ кыайаҕын.

Бу нэдиэлэҕэ студеннар учуонай-этнограф Томас Симокайтиһы кытта көрсүөхтэрэ уонна «Чужой родной язык» диэн төгүрүк остуолга кыттыахтара, онно сахалыы көҥүллүк саҥарар араас омук дьоно кыттыахтара.