Александр Жирков мунньах саҕаланыытыгар өрөспүүбүлүкэ бырабыыталыстыбатын састаабыгар кыра уларыйыылар киирбиттэринэн сибээстээн, Александра Овчинникова 100 сааһыгар аналлаах тэрээһиннэри бэлэмнээһиҥҥэ уонна ыытыыга тэрийэр кэмитиэт састаабыгар уларыйыылар киллэриллибиттэрин иһитиннэрдэ, диэтилэр Ил Түмэн пресс-сулууспатыгар.

Саха Өрөспүүбүлүкэтин бырабыыталыстыбатын бэрэссэдээтэлин солбуйааччы Алексей Дьячковскай тэрээһиннэри ыытыыга былааннаммыт үлэ үксэ туолбутун, Ньурба улууһун дьаһалтата Ньурба куоратыгар Александра Овчинникова аатынан сквери оҥорууга уонна кини бюһун туруорууга сэниэлээхтик үлэлиирэ эрэйиллэрин бэлиэтээтэ. Дьокуускай куоракка А.Я.Овчинникова бюһа “Албан аат” бырайыагы олоххо киллэрии чэрчитинэн туруоруллуохтаах. Общественность үөрүүлээх мунньаҕын ыытыыга сценарий барыла кыратык чочуллуохтаах.

Ньурба улууһун дьаһалтатын баһылыгын бастакы солбуйааччы Иннокентий Васильев Александра Овчинникова 100 сааһыгар аналлаах сквери оҥорууга уонна кини бюһун туруорууга үбүлээһинэ ситэ көстүбэтэҕэ атахтаабытын ыйан туран, эбии үбүлээһин наадатыгар тохтоото.

Александр Жирков ити үлэлэри ыытыыга бастаан көрүллүбүт үбүлээһин кээмэйэ мунньаҕынан куоластанан, боротокуолланан ылыллыбытын, онуоха ол кэмҥэ туох да утары этии оҥоһуллубатаҕын ыйан туран, көрүллүбүт сууманан үлэлэр саҕаланыахтаах этилэрин, ылыллыллыбыт былаан туолуохтааҕын туһунан эттэ. Кини Александра Овчинникова туһунан “Уһулуччулаах дьоннор” сериянан кинигэни таһаарыыга бюджеттан көрүллүбүт суумаҕа тиийбэт өттүн эбии булан булан таһаарбыттарын, өссө иккис кинигэни, ханнык да бюджекка киирбэтэҕин үрдүнэн, эбии таһаарар суолу тобулбуттарын иһитиннэрдэ. Ол курдук, Александра Овчинникова салайбыт кэминээҕи событиелар хроникаларын туһунан кэпсиир кинигэ бэчээккэ бэлэмнэммит, сотору тахсара күүтүллэр.

ХИФУ научнай-практическай конференцияны тэрийэн ыытарга бэлэмнэнэр, бастыҥ студеннарга А.Я.Овчинникова аатынан 10 тыһыынча солкуобайдаах биирдэ бэриллэр стипендияны олохтуур туһунан быһаарыы ылыммыт. Ол үөрүүлээх мунньах кэмигэр туттарыллыахтаах.

Кэпсэтиигэ кыттыбыт Ньурба улууһуттан норуот депутата Владимир Прокопьев А.Я.Овчинникова үбүлүөйэ 2015 сылга ыытылларынан сибээстээн, ити боппуруостары быһаарыыга кэлэр сыл бюджетын суотугар икки өттүттэн – өрөспүүбүлүкэттэн уонна улуустан – тэҥ төрүккэ, кыттыгас үбүлээһининэн эбии харчыны булары туруоруста. Депутат итинник ис хоһоонноох этиини бэлэмнээн кэмитиэт аныгыскы мунньаҕын көрүүтүгэр киллэриэх буолла.

Манна эбэн эттэххэ, Александра Овчинникова туһунан сонуннары киэҥник тарҕатар средстволарга сырдатыы былааннаахтык бара турар, Саха сирин чулуу кыыһын туһунан киинэ уһуллубут, Ил Түмэн бэрэссэдээтэлэ Александр Жирков уонна норуот депутаттара быйыл алтынньы 17 күнүгэр киин куоракка Массыына суолун өрөспүүбүлүкэтээҕи бырабылыанньатын дьиэтигэр (Автодорожнай уулусса 10/2) А.Я.Овчинникова аатынан өрөспүүбүлүкэ суолун хаһаайыстыбатын Музейын үөрүүлээх быһыыга-майгыга арыйбыттар. Биллэрин курдук, Александра Овчинникова өрөспүүбүлүкэҕэ суолу тутуу эйгэтигэр өр кэмҥэ тахсыылаахтык үлэлээбит специалист уонна салайааччы буолар.

Кэмитиэт чилиэннэрэ салгыы тохсунньуга ыытыллыахтаах үөрүүлээх мунньах сценарийын, буолар сирин, мунньах культурнай чааһыгар кыттыахтаах артыыстары кытта үлэни, научнай-практическай конференцияны тэрийиини уо.д.а дьүүллэстилэр. Александр Жирков бэлиэ түгэҥҥэ бэлэмнэнии хаамыытын хонтуруоллуур мунньаҕы түмүктүүрүгэр кэмитиэт чилиэннэрэ аныгыскы мунньахха бары тэрээһин боппуруостары ыпсаран, ситэрэн-хоторон, толору бэлэмнээх кэлэллэригэр эттэ.