Бу күннэргэ Лука Трунин аатынан бириэмийэ лауреаттара биллиэхтэрэ, хомус республикатааҕы куонкурса ыытыллыаҕа. Бээтинсэҕэ «Сэргэлээх уоттара» Культура киинигэр Венгрияттан кэлбит «Мадьяры» этно-бөлөх кэнсиэрдиэҕэ. Субуота күн биллиилээх хомусчуттар, «Мадьяры» этно-бөлөх кэнсиэртэрэ буолуоҕа.

Өйүүн хомуһу сэргээччилэри Опера уонна балет театрыгар виртуоз-хомусчуттар, «Мадьяры» этно-бөлөх, «Эрэл», «Күндэл» үҥкүү народнай ансаамбыллар, Киргизия, Тува хомусчуттара, «Ай-сулустар» этно-бөлөх, «Дьөһөгөй» фольклор ансаамбыла кыттыылаах улахан кэнсиэргэ күүтэллэр. Киириитэ босхо.

Ахсынньы 1 күнүгэр Хомус музейыгар хомуһунан эмтээһин ыытыллыа. Салгыы музей үлэһиттэрэ уонна биллиилээх хомусчуттар Хаҥалас, Бүлүү улуустарынан сылдьан көрсүһүүлэри тэрийиэхтэрэ, кэнсиэр көрдөрүөхтэрэ.

«Варган аан дойдуга 200-кэ норуокка баар. Хомус дьону түмэр, иллэһиннэрэр, киһи дууһатын кэрэтин арыйар инструменынан буолар. Хомус күнэ бу былыргы музыкальнай инструмены харыстыырга, салгыы үөрэтиигэ, тэнитиигэ, пропагандалааһыҥҥа дьоһун тирэҕинэн уонна араас норуот бэрэстэбиитэллэрин сомоҕолуур күүһүнэн буолар», - диэтэ СИА корреспонденыгар Хомус музейын директора Николай Шишигин.

Сахалар хомуска былыр-былыргыттан ытыктабыллаахтык сыһыаннаһаллар, ытыс ымыыта буолбут инструмент билигин ыал аайы баар. Кэнники кэмҥэ хомуска оонньуон баҕалаах ахсаана биллэ эбилиннэ. Онон Хомус музейын үлэһиттэрэ 2015 сыл сааһыттан хомус уруоктарын биэриэхтэрэ.