Ааспыкка авиапорка баран  иһэн, таарыйа аатырбыт 17 кыбаарталга сылдьан аастыбыт. Сыт-сымар амырыын, бөх-сах ыһылла сытар. Бэйэтэ туспа сыбаалкаҕа кубулуйбут. Манна эбии ардах түһэн бырыынан-бадараанынан туолбут. Биир киһи “наадатыгар” бараары  улахан харгыстары көрсөн, нэһиилэ  туалеты булла. Тоҕо сүрэй диэммит, кыбаартал бүгүҥҥү хартыынатын хаартыскаҕа түһэрэргэ, дьону кытта кэпсэтэргэ сананныбыт.

Саха норуотун улуу поэтын  аатын сүгэр  Семен Данилов уонна Космонавтар   уулуссаларын  ис өттүгэр киирдибит.  Тулабытыгар иккилии мэндиэмэннээх биэс самнархай дьиэ турар.    Бу 80-ча квартираҕа бөҕү-саҕы кутар  биир эрэ дьааһык турар. Онтубут даҕаны биһигини улаханынан сөхтөрбөтө. Эбиитин бу дьиэлэр толору хааччыллыыта суох буоланнар, ууларын-хаардарын барытын кыһыннары-сайыннары манна тоҕоллор. Онтулара тута туолан, таһыгар тоҕоллоругар тиийэллэр. Салайар хампаанньа сылга биирдэ-иккитэ эрэ хомуйарын олохтоохтор этэллэр. Кыһын хаар түһэн, тымныйан, сыттара-сымардара, бөхтөрө “кэнсиэрбэлэнэн” хаалар. Оттон саас уһуктуу саҕаланар...

Хаартыскаҕа түһэрэ турдахпытына, арай биир хара өҥнөөх омук массыынатыттан дьахтар хаһыыта иһилиннэ. Онуоха ыҥырбыппар, нэһиилэ кэллэ. Оруобуна бу территорияны хааччыйар “Дьулус” салайар хампаанньа бэрэстэбиитэлэ  Альбина Курчатова эбит.

-- Бу күннэргэ  ырааһырдыы үлэтэ ыытылла турар. Бөхпүтүн хомуйан, аны манна үс массыына кумах аҕалан кутуохпут. Биһиги кыбаартал ахсын хомуйабыт, ыраастыыбыт. Таах олорбоппут ээ. Миигин олохтоохтор бары көрөн билэллэр. Уопсайа 16 туочукалаахпыт. Ууну-хаары оботторон баран,  уонча массыына кумаҕы куттарар былааннаахпыт. Аныгыс нэдиэлэҕэ кэлэн көрөөрүҥ, манна барыта кумаҕынан кутуллубут буолуоҕа, -- диэн эрэннэрдэ. Ол эрээри 16 туочукаҕа уонча массыына кумах аҕыйаҕа биллэр. Бу кутаҕа кубулуйбут сири, массыына аҥара эрэ кумах быыһаабата буолуо.

Туалет тутуутугар дотация көрүллэр эбит. Былырыын Пионерскай уулусса 41-гэр уонна Якутскай уулусса 41-гэр саҥаны туппуттар. Дьиҥэр, 12-лии, 16-лыы квартиралаах дьиэлэргэ бэйэлэрэ тус-туһунан туалеттаахтара буоллар, баҕар быһыы-майгы арыый да буолуо эбит. Ол эрээри бу кыаллыбат чинчилээх.

Бу дьиэлэртэн биирдэстэригэр  бастакы сылын куортамнаан олорор уол: “Ити бүгүн эрэ кэлэн хомуйдулар. Биир сыл олордум да, салайар хампаанньа үлэһиттэрин саҥа көрдүм. Хомуйдулар да, бөх-сах син биир оҥойо сытар”, -- диэтэ. Бу уол толору хааччыллыыта суох икки хостоох квартираны 10 тыһ. солк. куорамнаан олорор.  Уутун атын сиртэн аҕалынар.

17-с кыбаарталга үгүстэрэ кэлии дьон. Омуктар да бааллар. Тыаттан кэлбиттэр уонна эдэр ыччат. Улахан аҥардара куортамнаһан олороллор. Сыаната куорат киининээҕэр уонна толору хааччыллыылаах дьиэтээҕэр чэпчэки буолан, баҕарбатар да, манна талаһаллар.

Оттон бэҕэһээ, сааскы ырааһырдыы туһунан суруйа сылдьарбын билэн, Строительнай уокурук олохтооҕо Аграфена Сивцева биһиги редакциябытыгар кэлэ сырытта. Отуттан тахса сылы быһа фелдьшеринэн тыаҕа үлэлээбит дьахтар пенсияҕа тахсан баран, куоракка үлэ көстөн,  былырыын кыһын көһөн кэлбит. Дьиэ сыаната куорат кытыытыгар арыый да чэпчэки буолан, Жорницкай уулуссаҕа квартира атыыласпыт. “Кыһыны этэҥҥэ туораатым эрээри, дьэ кыбаартал сытын-сымарын билэн эрэбин. Арыт күн дьиэбэр сотобунан ууну кэһэн киирэбин. Линолеуммут анна барыта уу. Хаамтахха бырдаҥалаан тахсар. Аны сыта-сымара. Хаста даҕаны управляющай хампаанньаҕа эрийбитим да туһа суох. Биирдэ эрэ кэлэн ууну оботторбуттара”, -- диэн хараастан туран кэпсээтэ.

Аграфена Михайловна кыһалҕатын истээт, тутатына “Дебют” салайар хампаанньаҕа телефоннаатым. Диспетчер дьахтар  Сивцеваны билэрин, итиэннэ  бу күннэргэ өссө ууну хачайдыахтаахтарын,  кумах кутуохтаахтарын эттэ. Дьэ ол төһөтө туолар, билбит суох.

Дьиҥэр, квартира ыйдааҕы төлөбүрүгэр ырааһырдыыга, бөҕү-саҕы хомуйууга анал строка баар ээ. Бу төлөбүр 800 солкуобайга тиийэр. Маны хас биирдии квартираҕа төгүллэтээтэххэ, мөлүйүөнүнэн ааҕыллар.

Оттон субуота күн, Дьокуускай куорат  баһылыга Айсен Николаев 17-с кыбаарталга сылдьыбыт этэ. Биьиги сырыыбыт кэннэ барытын кеннеруех буолан эрэннэрбиттэрэ. Ыам ыйын 12 кунугэр хаттаан кере тиийиэхпит.