Денис Мацуев гастроллуур графига хас да сыл инниттэн суруллар, кинини көрүөн баҕалаахтар эрдэттэн уочараттыыллар. Онуоха  Дьокуускайга муус устар 27 күнүгэр тиийэн кэлиитин классиканы таптааччылаа чахчы соһуччу уонна сүҥкэн бэлэх быһыытынан сыаналаатылар. Маныаха Мацуевы  аймаҕыргыы көрүөхпүтүн сөп. Тоҕо диэтэххэ, кини – сибиряк, Иркутскайтан төрүттээх, төрөппүттэрэ сити куоракка олороллор.

Оттон бу билиҥҥи сырыы кэнниттэн биһиги аатырбыт музыканы өссө чугастык ылынар бырааптаахпыт. Кини хос эһэтэ, Михаил Мацуев, ХХ үйэ саҕаланыытыгар Ленскэй оройуонун Мухтуйа бөһүөлэгэр олорбут. Ол саҕана Никольскайдааҕы храмҥа сулууспалаабыт. Онон Саха сиригэр сыһыаннаах буолан тахсар. Аны Ленскэйиҥ да, Иркутскайыҥ да субу ыаллыы сытар буоллахтара.

Денис Мацуев Дьокуускайга сырыытынан олуһун астынна. Өссө да кэлиэҕин биллэрдэ. Онуоха диэри «театрга үчүгэй хаачыстыбалаах роялла ылаарыҥ дуу», диэн баҕа санаатын эттэ.