"Сочитааҕы олимпиада, Казань куоракка ыытыллыбыт универсиада аһыллыыларын бары көрбүттэрэ. Инньэ гынан «Азия оҕолоро» оонньууттан таһыччы атын таһымы күүтэллэр", - диэтэ култуура уонна духовнай сайдыы миниистирэ Андрей Борисов. Кини этэригэр сигэннэххэ, аан дойду таһымнаах күрэхтэһии аһыыллыытыгар толору ситэриллибит-хоторуллубут, аныгы кэмҥэ сөп түбэһэр площадка наада.  

"Туймаада" ити ирдэбиллэргэ эппиэттэспэт буолбута ыраатта. Министиэристибэ күрэхтэһии аһыллыытын сиэрин-туомун ыытыыга сценарий куонкуруһун биллэрбитэ. Киирбит үлэлэргэ саҥа сүүрээн суох", - диэтэ култуура миниистирэ.  

Оонньуу тэрийэр кэмитиэтин баһылыга, государственнай сүбэһит  Дмитрий Глушко Андрей Борисов иһитиннэриитин кэнниттэн соторутааҥҥыта буолбут спорт улахан тэрээһиннэригэр күрэхтэһиигэ соччо сыһыана суох анал стадионнар тутуллубуттарын туһунан эттэ.

"Ол биһиэхэ кыаллыбат. Улахана суох стадиоммутугар тэрээһини ыытарга тиийэбит. Оробуочай бөлөҕү тэрийэн, стадиону ситэриэхтээхпит. Сиргэ эрэ буолбакка, баар сабардыыр эргимтэни барытын туруорууларга туһаныаҕыҥ", - диэн Дмитрий Глушко этии киллэрдэ. 

Кытайга буолар эдэр дьон олимпийскай оонньууларыгар Саха сириттэн кэтээн көрөөччүлэр барыахтара.  «Улахан сабардамнаах күрэхтэһии уопутун онно көрүөххэ наада", - диэтэ кини.

Сыл бүтүүтэ күрэхтэһии аһыллыытын сиэрин-туомун барыллааһын сценарийын, онно тирэҕирэн сметаны оҥорорго эттилэр.