«Азия оҕолоругар» бэлэмнэнии хаамыытын туһунан Оонньуулар норуоттар икки ардыларынааҕы комитетын президенэ Дмитрий Глушко иһитиннэрии оҥордо.

Күрэхтэһии 21 спорт көрүҥүн хабыаҕа, олору ыытыы туһааннаах республикатааҕы, Россиятааҕы, норуоттар икки ардыларынааҕы спортивнай федерациялары кытта сөбүлэһиннэриллибит. Билигин Оонньуулар балаһыанньалара былаас федеральнай уорганнарыгар сөбүлэһиннэриини ааһар.

Оонньууларга Уһук Илиҥҥи, Сибиирдээҕи, Ураллааҕы федеральнай уокуруктар, Башкортостан, Татарстан, Москва, Азия дойдуларын сүүмэрдэммит хамаандалара кыттыахтара. Оонньууларга кыттарга ыҥырыы Былыргы Олимпия куоратын хамаандатыгар ыытылынна.

Дмитрий Глушко бэлиэтээбитинэн, билигин Оонньууларга кытыннарыыга билиһиннэрии үлэ күүскэ барар. Оонньуулары ыытыыга бииргэ үлэлэһиигэ Казахстан, Холбоһуктаах Арабскай Эмираттар, Саудовскай Аравия уонна Йемен национальнай олимпийскай комитеттарын кытта сөбүлэһии түһэрсиллибит. «Азия оҕолоро» VI Оонньууларга 30-ча дойду кыттара былааннанар.

Мунньахха Оонньууларга бэлэмнэнии былаан быһыытынан барара бэлиэтэннэ.

Республика правительствотын председателэ, «Азия оҕолоро» норуоттар икки ардыларынааҕы VI спортивнай оонньуулар тэрийэр комитеттарын салайааччы Галина Данчикова 2015 сыл тохсунньу 1 күнүгэр диэри бары хамыыһыйалар тэриллэн, бэйэлэрин хайысхаларынан үлэни саҕалыылларыгар эттэ.

Маны тэҥэ премьер-министр комитет чилиэннэригэр болҕомтону тэрээһин үлэ хаачыстыбатыгар ууралларыгар эттэ. «Хамыыһыйалары тэрийиигэ ааспыт Оонньуулар көтүтүүлэрин учуоттуохха наада», - диэтэ кини.

Бу туһунан республика правительствотын председателин сайтыгар этиллэр.