Быйылгы үөрүүлээх түгэн А.Пушкин аатынан СР Национальнай библиотекатын Историяҕа саалатыгар буолла. Сэттэ номинацияҕа улуустартан уопсайа 60-тан тахса сайаапка киирдэ. Дьүүллүүр сүбэ бастыҥнартан бастыҥнары талла.
 Үөрүүлээх бэлиэ түгэҥҥэ мустубут дьоҥҥо туһаайан, “Саха-Азия оҕолоро” фонда бэпэчиитэллэрин сэбиэтин председателэ Екатерина Никитина фонда тэриллэн үлэлээбитэ 21-с сыла буолбутун эттэ. Бу сыллар усталарыгар элбэх үлэ ыытыллыбытын бэлиэтээтэ. Кини фонда ситиһиилээхтэри эҕэрдэлээһининэн эрэ муҥурдаммакка тулаайах оҕолорго, элбэх оҕолоох дьиэ кэргэҥҥэ болҕомтону ууран, үгүс өрүттээх үлэни тэрийэллэрин бэлиэтээтэ. Маны сэргэ, маннык эҕэрдэлээһин 15-с төгүлүн ыытылларын иһитиннэрдэ. 
Салгыы дохсун ытыс тыаһыгар доҕуһуоллатан, лауреаттарга харчынан бириэмийэни сэргэ, махтал суруктар, бэлэхтэр туттарылыннылар. «Бриллианты республики» номинацияны Өлүөхүмэ куорат “Эврика” гимназиятын 11 кылааһын үөрэнээччитэ Юлия Никитина ылла. «Красота спасет мир» номинация кыайыылааҕынан көрөөччүлэрин талаанынан сөхтөрбүт  «Эдельвейс» эстраднай үҥкүү коллектива (Жатай) буолла. «Саха» НКИК республикатааҕы радиотын социальнай программаларга редактора, истээччилэр куттарын туппут суруналыыс Полина Перуашева үүнэр көлүөнэни кытта үлэ бары хайысхатын сырдатыыга тиһиктээх үлэтэ сыаналанан “Свет знаний» лауреат үрдүк аатын ылла. Дьокуускай куораттааҕы оҕо балыыһата оҕо доруобуйатын тупсарыыга сырата болҕомтоҕо ылыллан, «Путеводная звезда» кыайыылааҕынан ааттанна. «Со спортом по жизни» номинацияҕа бу сыл түмүгүнэн икки лауреаттанныбыт, иккиэн -- дуобатчыттар. Дьокуускай куораттааҕы классическай гимназия 6 “А” кылааһын үөрэнээччитэ, 5 №-дээх ДЮСШ дьарыктанар Анатолий Протодьяконов уонна Чурапчытааҕы спортивнай оскуола-интернат 11 кылааһын үөрэнээччитэ Ангелина Попова наҕараадаланнылар. Арктика сылын чэрчитинэн биллэриллибит «Северное сияние» номинацияҕа Абый оройуонун Белай Гора бөһүөлэр баар оҕо искусствотын оскуолата тигистэ.

Үрдүк чиэскэ тиксибит лауреаттары уонна мустубут ыалдьыттары СР культуратын үтүөлээх үлэһитэ, СР үөрэҕириитин туйгуна Владимир Корякин-Индигирскэй салайар вокальнай отделениетын куораттааҕы  2 №-дээх оҕо искусствотын оскуолатын үөрэнээччиллэрэ Наташа Третьякова, Ньургуйаана Ордахова, Эмиль Васильев киэргэттилэр.
Дуобатчыт Ангелина Попова ийэтэ уонна иккис тренерэ Ая Ильинична Кычкина үөрүүлэрин үллэһиннилэр:  "Ангелина билигин Польшаҕа күрэхтэһиигэ сылдьар. Кини кыратыттан дуобаттыыр. Бастакы улахан кыайыытын иккис кылааска үөрэнэ сылдьан ситиспитэ, онно аан дойдутааҕы чемпионакка бастаабыта. Итинтэн ыла дуобатынан күүскэ үлүһүйбүтэ. Ааһан эрэр 2014 сыл киниэхэ ситиһиилэри аҕалбытыттан үөрэбит", -- диэтилэр. Спортсменка быйыл “Саха-Азия оҕолоро” фонда лауреатынан уонна республика уон бастыҥ спортсменын ортотугар киирбит.