«Арктика улуустарыгар олорор дьиэни, социальнай эбийиэктэри тутуу, социальнай суолталаах табаары тиэйии сытыытык турар. Ити барыта правительствоны кытта түһэрсибит сөбүлэһиибитигэр киирдэ», - диэтэ Иван Семенов. 

44-с №-дээх «Атыылаһыы эйгэтигэр контрактнай систиэмэ туһунан» федеральнай сокуон саҥа редакцията ыраах уонна киин оройуоннарга биир тэҥ усулуобуйаны үөскэппитин, биһиги айылҕабыт, климаппыт уратыта, тырааныспарбыт схемата аахсыллыбатын туһунан кини эттэ. «Онон биһиги РФ Арктическай түөлбэтин туһунан» сокуону үөскэтиэхтээхпит, - диэтэ кини. 

«Улууспутугар «Анаабыр алмаастара» тэрилтэни кытта көдьүүстээхтик үлэлиибит. Кыһыҥҥы кэмҥэ таһаҕаһы тиэйиини манна холобур быһыытынан аҕалыахха сөп. Панельнай дьиэлэри тутууга матырыйаалы эһиил бу тэрилтэ эмиэ тиэйиэх буолла. Кэтэх олорор 12 дьиэни тутар туһунан тыа хаһаайыстыбатын министиэристибэтин кытта дуогабардастыбыт. Ону таһынан республика правительствота түөрт квартиралаах олорор дьиэлэри тутарбытыгар көмөлөһүө диэн эрэнэбит», - диэтэ Иван Семенов. 

Правительство уонна улуустар түһэрсибит дуогабардара икки өттүттэн эппиэтинэһи улаатыннарыыга олугу уурарын кини бэлиэтээтэ. "Сөбүлэһии чэрчитинэн туох ситиһиллибитин туһунан эһиил Анаабырга правительство көһө сылдьар мунньаҕар ырытар туһунан этиилээхпин», - диэтэ И.Семенов.