Улууска 18 муниципальнай бырагыраама үлэлиир. Олохтоох салайыныы уорганнарын үлэтин көдьүүһүн сыаналааһыҥҥа 2013 сыл түмүгүнэн өрөспүүбүлүкэ биир сайдыылаах промышленнай оройуона 4-с миэстэҕэ тахсыбыта.

Бырабыытылыстыба көһө сылдьар мунньаҕын кыттыылаахтара күн бастакы аҥарыгар 7 бөлөҕүнэн, куорат промышленнай тэрилтэлэригэр сырыттылар уонна социальнай объектар туруктарын кытта билистилэр. Күнүстэн киэһэ киэҥ ыҥырыылаах мунньахха тирээн турар боппуруостары ырыттылар.

Промышленнай оройуон биир сүрүн кыһалҕатынан манна хаарбах туруктаах дьиэ элбэҕэ буолар. Мунньахха олорор дьиэ 54%-на капитальнай өрөмүөнү эрэйэрэ бэлиэтэннэ. 2017 сылга диэри оройуоҥҥа 419 хаарбах уонна саахалланар туруктаах дьиэ көтүрүллүөхтээх. 2015 сылга Серебрянай Борга -- үс, Нерюнгри куоракка биэс саҥа олорор дьиэ тутуллуоҕа. Бырабыыталыстыба бэрэссэдээтэлэ Галина Данчикова: "2017 сыл балаҕан ыйыгар диэри дьон иннигэр ылыныллыбыт бу эбэһээтэлистибэ хайаан да туолуохтаах", -- диэн мунньах кыттыылаахтарыгар тоһоҕолоон бэлиэтээтэ.