Тыйаатыр артыыстара икки испэктээги кѳрдѳрдүлэр, ол курдук, о5олорго Карло Коллоди аан дойдуга аатырбыт остуоруйатынан режиссер, СӨ култууратын туйгуна Розалия Тартакынова туруорбут «Пиноккио мүччүргэннээх сырыыларын» уонна   ааспыт сыл сэтинньи 15 күнүгэр тыйаатыр сценатыгар  премьерата буолбут «Күкүр Уус» драматын.  Саха норуодунай суруйааччытын  Сивцев Д.К.- Суорун Омоллоон «Күкүр Уус» айымньытын тыйаатыр уус-уран салайааччыта-дириэктэрэ, СӨ искусствотын үтүөлээх деятелэ Юрий Макаров  СӨ үтүөлээх артыыҺа Борис Иванович Борисов күн сирин көрбүтэ 65 сааҺыгар уонна Ньурба тыйаатырыгар  бэриниилээхтик  үлэлээбитэ 40 сылыгар анаан туруорбута.

 Ньурбатаа5ы государственнай көҺө сылдьар драматическай тыйаатыр кэлэктиибигэр Борис Иванович Борисов  бары өттүнэн холобур буолар  ытыктыыр киҺибит, эдэр артыыстарга үтүө холобур буоларын таьынан наар сүбэ-ама биэрэн, артыыс маастарыстыбатын кистэлэҥинэн дэлэгэйдик үллэстэр уопуттаах артыыспыт. Борис ИвановиҺы биҺиги ураты сымна5ас майгылаах, киэҥ кө5үстээх, чиэҺинэй, эппиэтинэстээх киҺи быҺыытынан билэбит. Уус-уран аа5ыынан, нуучча дуобатынан утумнаахтык дьарыктанарын таҺынан саха тустууктарын, хапса5айдьыттарын эрэллээх ыалдьааччыта, чөл олох үгэстэрин тар5атааччы. 1974 сыллаахха Щепкин аатынан училищены кыҺыл дипломунан түмүктээбит Борис Борисов Ньурба тыйаатырыгар ананан кэлэн үлэ үөҺүгэр түспүтэ, 40 сыллаах үлэтин тухары 100-чэ араас уобарастары толордо. Бэйэтэ Уус-Алдан Лөгөйүттэн төрүттээх Борис Иванович  Сунтаар ытык сиригэр төрөөбүт кэрэ-мааны Любовь Викторовнаны кытта ыал буолан икки уол о5о5о күн сирин көрдөрбүттэрэ,  иккис дойду оҥостубут  таптыыр-ахтар Ньурбаларын сиригэр билигин сиэннэрэ улааталлар, эбээ, эҺээ буолар дьолун бэлэхтииллэр.