Бастаан улуус бары нэһилиэктэринэн оскуола саастаах оҕолору хабан миэстэтигэр үлэ ыытыллыбыта, оттон Бороҕоҥҥо улахан фестиваль буолла. Олохтоохтор бу сонун сүүрээни олус сэргээтилэр, түмүктүүр тэрээһиҥҥэ көхтөөхтүк кытыннылар.

Фестиваль көҕүлээччилэринэн Уус-Алдан улууһун баһылыга Алексей Федотов, ону тэҥэ оройуон Сэбиэтин депутата, спорт, дьиэ кэргэн уонна ыччат дьыалаларыгар бастайааннай хамыыһыйа бэрэссэдээтэлэ Леонид Сергеев, Аан дойдутааҕы чөл олох академиятын профессора, педагогическай наука кандидата Матвей Лыткин буоллулар. Кинилэр сүрүн үлэни иилээн-саҕалаан ыыттылар. Уус-Алдантан төрүттээх, остуол тенниһигэр Дальнай Востоктааҕы федеральнай уокурук икки төгүллээх чемпиона Василий Румянцев ыҥырыылаах ыалдьытынан буолла.

Бороҕоҥҥо фестиваль чэрчитинэн "Мин доруобуйам — бэйэм илиибэр" девизтээх скандинавскай ньыманан маассабай хаамыы буолла. Тэрээһин кыттыылаахтара өҥнөөх футболкалары кэтэн, нэһилиэк киин уулуссаларынан республикабытыгар киэҥник тарҕанан эрэр доруобуйаны тупсарар ньыманан хааман үгүс дьон болҕомтотун тартылар. Барыта 300-чэкэ киһи кытынна.

Фестиваль биир суолталаах түгэнинэн "Арыгыта суох чөл олох — Уус-Алдан инникитэ" диэн тиэмэҕэ төгүрүк остуол ыытыллыбыта буолла. Манна кыттыбыт дьон үүнэн эрэр эдэр көлүөнэ инникитин кэҕиннэрбэт сыалтан арыгынан эргинэр биирдиилээн тэрилтэлэргэ уонна урбаанньыттарга Уус-Алдан улууһугар арыгы атыытын төрүт тохтотору модьуйар ыҥырыыны ылыннылар. Кулун тутар 28 күнүн Саха Республикатын дьонугар-сэргэтигэр скандинавскай хаамыы күнүнэн биллэрэргэ этии киллэрдилэр. Субу курдук ураты тэрээһин үгүс киһини түмэн үтүө түмүктэрдээх буолла.