Делегация састаабыгар „Хара нэһилиэгэ“ МТ баһылыга Дария Назарова, „Мэҥэ нэһилиэгэ“ МТ баһылыга Ирина Черкашина, „Мыла“ бааһынай хаһаайыстыба салайааччыта Дмитрий Назаров, И.М.Сосин аатынан улуустааҕы киин библиотека директора Елизавета Корнилова, „Айыллаан“ культурнай киин директора Светлана Аргунова, „Аллараа Бэстээх“ социальнай-культурнай киин специалиһа Владимир Кузьмин уонна „Төлөн“ вокальнай ансаамбыл солиһа Павел Егоров сырыттылар.

Алданнар биир дойдулаахтарбытын истиҥник көрүстүлэр. Оройуон баһылыга Северин Поздняков „Алдан оройуонун экономическай сайдыытыгар“ уонна „Алдан уонна Мэҥэ-Хаҥалас оройуоннарын доҕордоһуу сыһыаннарын сайыннарыыга кылааттарын иһин“ „Сиэрпэ уонна Өтүйэ“ лауреатын бочуотунай лиэнтэтин „Мыла“ бааһынай хаһаайыстыба салайааччытыгар Дмитрий Назаровка үөрүүлээх быһыыга-майгыга туттарда.

Бу күн Алдан оройуонун баһылыгын социальнай боппуруостарга солбуйааччы Игорь Сахно улууспут бэрэстэбиитэллэригэр „Аһымал“ бырайыак чэрчитинэн Үтүө санааланыы Чороонун туттарда. Нерюнгри Удачнайыттан үөдүйбүт бырайыак символическай Чорооно республика бары улуустарын кэритиллиэхтээх эбит. Чороону тэҥэ социальнай өртүнэн көмөҕө наадыйар дьиэ кэргэттэргэ анаан үөрэх тээбириннэри нбэлэх ууннулар.

Улууспут олохтоохторо „Кыһыны атаарыы“ бырааһынньыгар, Доҕордоһуу кэнсиэригэр сырыттылар.