Экономика министерствотын сыанабылынан,  2013 сыллаах былааннар уопсайынан туоллулар. Промышленность оҥорон таһаарыыта оннунан хаалла:  нефть, алмаас уонна кыһыл көмүс хостооһуна эбилиннэ, туһалаах сиртэн хостонор баайы ылар тэрилтэлэр үгүстэрэ сайдыыларын тэтимэ сайынна.

Хамнас кээмэйэ (107,4%) улаатта  уонна нэһилиэнньэ  дохуота элбээтэ (102,2%), үлэтэ суох буолуу аччаата, табаар розничнай эргиирэ (104,5%-нан) уонна өҥөнү оҥоруу (100,7%-нан) улаатта.

Олорор дьиэни тутуу түргэтээтэ: 2013 сыллаахха  405,8 тыһ. квадратнай миэтэрэ буолла.
Сыл түмүгүнэн валовай региональнай бородуукта  2%-нан улаатта, инфляция  6%, ол Россияҕа орто көрдөрүүттэн намыһах.
Ол да буоллар, ситиһиллибит түмүктэри сэргэ, сүрүн капитал, тутуу үлэлэрэ намтаабыттара бэлиэтэннэ. Ол «Сургутнефтегаз» ААО, «Якутуголь» ААО ХК , «ДВУЭК» ААО тэрилтэлэр инвестициялара аҕыйаабытынан, ИСТА тутуута түмүктэммитинэн ситимнээх.

Алмаас-бриллиант ырыынагар атыылааһын үчүгэй. Кыһыл көмүһү хостооһун  22,5 тоннаҕа тиийдэ, ол былаан 16,4 %-нан куоһарыллыбытын көрдөрөр.

Министерстволар уонна ведомстволар, муниципальнай оройуоннар уонна куорат уокуруктара, республика тэрилтэлэрин салайааччылара эппиттэрин ситэрэн, премьер-министр Галина Данчикова  2014 сыллаахха уруккутун курдук сүрүн хайысхаларынан социальнай сайдыы буоларын бэлиэтээтэ.

Сүрүн соруктарынан, нэһилиэнньэ дохуотун 3%-тан, экономическэй сайдыыны 4,7%-тан  промышленнай оҥорон таһаарыыны 4,.5%-тан, үлэлээн таһаарыыны  4%-тан итэҕэһэ суох үрдэтии, олорор дьиэ тутуутун 450 квадратнай миэтэрэҕэ тиэрдии, ночооттоох тэрилтэлэри аччатыы, дойду  президенин ыам ыйынааҕы уураахтарын толоруу, ол иһигэр нэһилиэнньэ сорох араҥатын хамнастарын улаатыннарыы буолаллар.

Ити туһунан СИА-ҕа республика президенин уонна правительствотын управлениетыттан иһитиннэрэллэр.