Үп миниистирэ  Валерий Жондоров иһитиннэрбитинэн, өрөспүүбүлүкэ бюджетын чуолкайдаммыт-чопчуламмыт параметрдара манныктар: федеральнай бюджеттан 3,6 млрд солк. эбии киирбитинэн өрөспүүбүлүкэ бюджетын дохуоттаах чааһа 137 млрд.солк. диэри улааппыт. Ороскуот 5,9 млрд солкуобайынан эмиэ улаатан, 149 млрд 892 мөл. солк. тэҥнэспит. Онон бюджет дефицитэ 2,3 млрд солк. үрдээн, 12 млрд 700 мөл. солк. диэри тиийбит.  

Бюджекка уларытыылары дьүүллэһиигэ бырабыыталыстыба бэрэссэдээтэлэ  Галина Данчикова быйылгы бюджет уустук быһыыга-майгыга үөскэтиллэрин ордук бэлиэтээтэ.  «Эбии дохуоту чопчулааһын суох. Хос үбүлээһиҥҥэ, чөлүгэр түһэриигэ уонна солбуйууга эрэ уларытыылар киирэллэр. Баҕабыт улахан, ол эрээри бюджет хаарчахтаах», - диэтэ премьер. 

Галина Данчикова министиэристибэлэргэ уонна биэдэмистибэлэргэ туһаайан билигин үлэлии турар судаарыстыбаннай бырагыраамалар иҥэн-тоҥон ырытыллалларын уонна көдьүүһэ суох ороскуот аччатыллыахтааҕын туһунан эттэ.

Социальнай хайысхаҕа үлэлиир министиэристибэлэр федеральнай структуралары кытта «Суол каартатын» тула үлэ барарынан балаҕан ыйыгар-алтынньыга бюджет өссө чуолкайданыахтааҕын туһунан премьер эттэ.