Санатан эттэххэ, ыраах сытар нэһилиэк олохтоохторо Орто-Сурт - Кэптин массыына суолун тутарга боппуруос туруорбуттара ыраатта. Өссө 2012 сыллаахха бастакы көрсүһүүлэригэр миниистир Семен Винокуров  2011 сылы отчуоттуур кэмигэр нэһилиэнньэ туруорбут кыһалҕатын быһаарарга миэрэ ыларга эрэннэрбитэ. 2012 сыл устата саамай сатаан сылдьыллыбат суол учаастактарыгар өрөмүөн үлэлэрэ ыытыллыбыттара, онон сыл устата нэһилиэнньэ итинэн мэһэйэ суох тутта сылдьыбыта.

Оттон 2013 сыллаахха манна республики Суолун фондатын үбүнэн суол тутуута саҕаламмыта. Ол курдук, ааспыт сыллаахха Суол фондатын үбүттэн  30 мөл тахса  солкуобайынан   ити суол 14 км устатын бырайыактааһын үлэлэрэ ыытыллыбыттар,  5 км оҥоһуллубут, Орто-Сурт - Кэптин 2 км-дээх суола өрөмүөннэммит. Итини таһынан, Бэрдьигэстээх - Өрт, Дьиикимдэ - Эбэ, Бэрдьигэстээх - Аэропорт, Орто-Сурт — Кэптин олохтоох суоллары туттууга фондаттан субсидия түҥэтиллибитэ. 

Бэрдьигэстээх, Маҕан, Кировскай, Маалтааны уонна Мытаах нэһилиэктэрин уон суолларын капитальнай өрөмүөннэригэр уонна уулуссаларын тупсарыыга республика Суолун фондатыттан 4,5 мөлүйүөн ыытыллыбыта. Итини таһынан Бэрдьигэстээххэ элбэх квартиралаах дьиэлэр олбуордарын уонна онно киирии суоллары өрөмүөннүүргэ өссө 2,5 миөлүйүөнтэн тахса бэриллибитэ.  

СИА СР Минтрансын пресс-секретара  Туяра Харитонова биллэрбитинэн, Семен Винокуров салалталаах бөлөх өссө ыаллыы Орто-Сурт нэһилиэгэр сырытта. Икки көрсүһүүлэр истиҥ сэһэргэһии быһыытынан аастылар. Нэһилиэнньэни ордук тыа хаһаайыстыбатын боппуруостара долгуталлар.  Тыа олохтоохторо үүт сыана намыһаҕын, ынах үөһү уонна сылгы иитиитигэр субсидия кэмигэр кэлбэтин, сири ньүөлсүтэр үлэлэр ситэ ыытыллыбаттарын үҥүстүлэр.