Экономика миниистирэ Ольга Федорова эппитинэн, программа үбү-харчыны туттууга балайда көдьүүстээх, ону таһынан госсакаасчыттарга өр кэмнээх контрактары баттаһыыга кыаҕы биэрэр.

Итини таһынан кини ааһан эрэр сыл түмүгүнэн, инвестиционнай программанан үп 67%-на туттулунна. 2014 сыллаахха государственнай капитальнай уурунуу кээмэйэ икки төгүл аччыаҕа. Өскөтүн 2013 сыллаахха ити 21,1 млрд солкуобай буоллаҕына, аныгыскы сылга 9 млрд солк диэри «түһэрэ» сабаҕаланар.

«Ити харчы төһө да икки төгүл аҕыйах буоллар, олус элбэх диэн бэлиэтиир тоҕоостоох. Бүгүн биир сүрүн боппуруоһунан уруккутун курдук, бюджет үбүн капитальнай уурунууга көдьүүстээхтик туттуу буолара өйдөнөр. Ити соруктары толоруу чэрчитинэн биһиги атыылаһыы былааннарын алтыһыннарыы уонна холбооһун өйдөбүлүн киллэрэбит», - диэн быһаарда миниистир.

Кини этэринэн, сүрүн соруктарынан уруккутун курдук оскуолалары, олорор дьиэлэри, оҕо саадтарын тутуу, хаарбах уонна сууллаары турар дьиэлэри көтүрүү, инфраструктураны сайыннарыы буолаллар.