Санатан эттэххэ, олунньу 11-14 күннэригэр Өймөкөөн улууһугар республика толорор былааһын отчуоттара ыытылла тураллар. Улуус киинин – Уус-Ньара олохтоохторун кытта көрсүһүү кэнниттэн олунньу 12 күнүгэр икки бөлөх нэһилиэнньэлээх пууннарга тарҕаста. ОДЬКХ миниистирэ Алексей Колодезников салайааччылаах бөлөх ыраах сытар нэһилиэктэргэ — Үчүгэйгэ, Томторго, Сордоҥнооххо уонна Өймөкөөҥҥө сырыттылар.

Төрүккэ государство сакааһын Госкэмитиэтин бэрэссэдээтэлэ Александр Попов салалталаах бөлөх сырытта.
Улуус кииниттэн 240 км ыраах сытар нэһилиэккэ 320 киһи олорор. Ынах, сылгы иитэллэр. Сайын сүөгэй, иэдьэгэй оҥороллор, ону оройуон киинигэр атыылыыллар. Итини илдьии ыарахаттардаах. Нэһилиэккэ 100 оҕоҕо анаммыт орто оскуола баар, ол эрээри манна билигин 45 үөрэнээччилээх. Оҕо уһуйааныгар 30 оҕо сылдьар. Маны таһынан апкекалаах балыыһа, библиотека бааллар, почта аһыллыахтаах.

Олохтоохтор ыччат тыаҕа олохсуйбат, үлэ суох диэн үҥсэргииллэр. Нэһлиэнньэ үксэ пенсионердар. Сылы эргиччи сылдьыһар суол суоҕа сүрүн кыһалҕа.

Республика правительствота итиннэ болҕомтотун туһаайбытын кэннэ, оннуттан хамсаата. Оройуон былаастара «Халыма» суолтан Төрүккэ диэри 21 км-дээх суол бырайыагын оҥорон көмүскээбитэ. 2013 сыллаахха республика бюджетыттан 21 мөл солк көрүллүбүтэ. Олохтоохтор итини түргэтэтэргэ көрдөһөллөр.  

Төрүт олохтоохторун ыйытыыларыгар хардаран правительство чилиэннэрэ төрүөтэ суох эрэннэриилэри биэрбэтилэр. Минтранс сүрүн специалиһа Николай Попов: «Суолу тутууну салгыыр боппуруос олунньу бүтүүтүгэр быһаарыллыаҕа. Быйыл төһө харчы көрүллэрин этэр уустук. Ол эрээри суол син-биир тутуллуоҕа», - диэтэ.