Өймөкөөн улууһун Төрүтүн олохтоохторо улуус дьаһалтатын үлэтин «үчүгэйинэн» сыаналаатылар

«Өймөкөөн улууһа (оройуона)» МТ дьаһалтатын баһылыга Михаил Захаров 2014 сыллааҕы үлэтин отчуотун тохсунньу 20 күнүгэр Төрүт нэһилиэгиттэн саҕалаата. Оттон тохсунньу 21 күнүгэр дьаһалта оробуочай бөлөҕө Аартык уонна Уус-Ньара олохтоохторун иннигэр отчуоттаата.


Төрүт нэһилиэгэр улуус баһылыгын кытта депутаттар улуустааҕы сэбиэттэрин бэрэссэдээтэлэ, дьаһалта бэрэстэбиитэллэрэ, тэрилтэлэр салайааччылара сырыттылар. Ааспыт сыл бүтүүтэ улуус киинигэр аһыллыбыт «Мои документы» элбэх функцияны толорор киин бэрэстэбиитэлэ тыа сирин олохтоохторугар тэрилтэтин үлэтин сырдатта.
Улууска Культура сыла хайдах ааспытын, учууталлар, үөрэнээччилэр ситиһиилэрин культура, үөрэх салааларын салайааччылара Аксинья Сивцева, Марина Шеленговская сиһилии билиһиннэрдилэр. Маны сэргэ тыа хаһаайыстыбатын, үп, тутуу управлениеларын, спорт, ыччат салааларын бэрэстэбиитэллэрэ ааспыт сыллааҕы үлэлэрин отчуоттаатылар.
Отчуот кэнниттэн олохтоохтор кинилэри долгутар боппуруостарын ыйыталастылар. Бастакынан федеральнай трассаттан нэһилиэккэ киирэр суол хаһан ситэриллиэҕин токоолостулар. Коммунальнай хаһаайыстыба үлэтигэр үгүс боппуруос киирдэ. Итини сэргэ тыа сирин олохтоохторо олорор дьиэнэн хааччыллыы, ас-үөл сыанатын, тэрилтэлэр быстах өрөмүөннэрин туһунан ыйыталастылар.
Улуус баһылыга Михаил Захаров туруорсуулары барыларын боротокуолга киллэрэн болҕомтоҕо ылыахпыт диэтэ. Кини нэһилиэккэ общественнай түмсүү тэриллэрэ наадалааҕын тоһоҕолоон бэлиэтээтэ, онуоха түөлбэлэр үлэлэрин суолтата улаханын ыйда. Онон олохтоохтор туораттан көрөөччү эрэ курдук сылдьыбакка, олохторо туруктаах буоларын туһугар тус кылааттарын киллэрсэр кэмнэрэ кэлбитин өйдүөх тустаахтарын эттэ.
Быйыл Төрүт нэһилиэгэ төрүттэммитэ 50 сыла буолар. Онон сибээстээн нэһилиэккэ сыл устата үбүлүөйдээх тэрээһиннэр, үлэ дьонун чиэстээһин ыытыллыахтара.
Нэһилиэк бэлиэ сылыгар биир дьоһун бэлэҕинэн олохтоохтор көҕүлээһиннэринэн кулууп дьиэтигэр биир дойдулаахпыт, биллэр меценат Ньукулай Кырбаһааҥкын аатынан музей аһыллыыта буолар. Бу музейы тэрийбит нэһилиэк ытык киһитин, үгүс көлүөнэ тапталлаах учууталын Афанасий Крылову төрүттэр умнубаттар, кини саҕалаабыт дьыалатын ситэрэн, үүнэр көлүөнэҕэ тиэрдэр соруктаахтар.
Кэлэр нэдиэлэҕэ улуус дьаһалтатын оробуочай бөлөҕө Өймөкөөн түөлбэтигэр үлэлиэҕэ. Тохсунньу 28 күнүгэр — Үчүгэйгэ, тохсунньу 29 күнүгэр — Сордоҥнооххо уонна Өймөкөөҥҥө, онтон тохсунньу 30 күнүгэр Томторго улуус дьаһалтатын очуотун туруоруоҕа.